14ہزار ایجوکیٹرز سے سکیورٹی الاؤنس واپس لینے کا فیصلہ
لاہور(ایجوکیشن رپورٹر)مستقلی تو نہ ملی مگر الاؤنس کی ریکوری کا فیصلہ ہوگیا، ایجوکیٹرز تیرہ سالوں سے مستقل نہ ہونے کے باعث سوشل سکیورٹی الاؤنس لے رہے ہیں۔۔۔
حکومت نے چودہ ہزار ایجوکیٹرز سے کروڑوں روپے سوشل سکیورٹی الاونس کی ریکوری کرنے کا فیصلہ کیا ہے۔ صوبائی وزیر تعلیم کے دعوؤں کے باوجود 14 ہزار ایجوکیٹرز جون میں مستقل نہیں ہوسکے ،مذکورہ تمام ایجوکیٹرز نے تین سالہ کنٹریکٹ کے بعد 2014 میں مستقل ہونا تھا،سرکاری اساتذہ کے مستقل ہونے پر تنخواہوں میں سے سوشل سکیورٹی الاؤنس کاٹ لیا جاتا ہے ،دس سال سے زائد عرصہ گزر جانے کے باوجود ایجوکیٹرز کو مستقل نہیں کیا جاسکا۔ مستقل نہ ہونے کے باعث ایجوکیٹرز دس سال سے سوشل سکیورٹی الاؤنس وصول کررہے ہیں ،مذکورہ اساتذہ کے کنٹریکٹ میں ہر بار ایک سال کی توسیع کر دی جاتی ہے ،ایجوکیٹرز مستقلی کیلئے 13سالوں سے خوار ہونے پر مجبور ہیں، ایجوکیٹرز کو دوہزار گیارہ میں این ٹی ایس کے ذریعے بھرتی کیا گیا تھا،اساتذہ کی مستقلی کیلئے پنجاب پبلک سروس کمیشن کے امتحان کی شرط رکھی گئی ہے۔ اساتذہ بغیر امتحان دیئے مستقلی کیلئے عرصہ دراز سے سراپا احتجاج ہیں۔ ایجوکیٹرز کا کہنا ہے کہ تنخواہوں میں سوشل سکیورٹی الاؤنس کی ریکوری کی گئی تو بھرپوراحتجاج کریں گے۔
