رواں سال منعقد ہونیوالے کبڈی ایونٹس کیلئے بجٹ منظور
لاہور(ایجوکیشن رپورٹر)پاکستان کبڈی فیڈریشن کے صدرو صوبائی وزیر صنعت و تجارت شافع حسین کی زیر صدارت پاکستان کبڈی فیڈریشن جنرل کونسل کا مقامی ہوٹل میں 59 واں اجلاس منعقد ہوا۔
اجلاس میں رواں سال منعقد ہونے والے کبڈی کے ایونٹس کیلئے بجٹ کی منظوری دی گئی۔صوبائی وزیر صنعت و تجارت شافع حسین نے اس موقع پر گفتگوکرتے ہوئے کہاکہ رواں سال اپریل میں تین ملکی کبڈی ٹورنامنٹ کا انعقاد کیا جائے گا۔بابا گرو نانک کبڈی کپ میں پاکستان،بھارت اور ایران کی کبڈی ٹیمیں حصہ لیں گی۔متحدہ عرب امارات میں کبڈی کا ورلڈ کپ جلد منعقد ہوگا۔پاکستان کبڈی ٹیم ورلڈ کپ میں بھرپور شرکت کرے گی۔چوہدری شافع حسین نے کہاکہ ممالک کے تعلقات کو فروغ دینے میں سپورٹس کلیدی کردار ادا کرتے ہیں۔بدقسمتی سے مودی سرکار پاکستان کی نفرت میں اپنی سپورٹس ٹیمیں نہیں بھجواتی۔کوشش کریں گے کہ بھارت کی کبڈی ٹیم بابا گرو نانک کبڈی کپ میں ضرور شرکت کرے ۔صوبائی وزیر نے کہاکہ پنجاب کی طرح کے پی کے میں بھی کبڈی کے کھیل کو پسند کیا جاتا ہے ۔کے پی کے میں کبڈی ٹورنامنٹ کے انعقاد کیلئے سپانسر شپ کیلئے بات کریں گے۔
