ضلع ملتان میں گھر گھر کورونا ویکسی نیشن مہم جاری
دو روز میں 62 ہزار سے زائد افراد کی کورونا ویکسی نیشن کر لی گئی
ملتان(نیوز رپورٹر)حکومت پنجاب کی ہدایت پر ضلع ملتان میں گھر گھر کورونا ویکسی نیشن مہم جاری ہے ۔ مہم کے پہلے دو روز کے دوران 62 ہزار سے زائد افراد کی کورونا ویکسی نیشن کر لی گئی تفصیل کے مطابق حکومت نے ملتان سمیت صوبے کے پانچ اضلاع کو 14 اگست تک 18سال سے زائد عمر کے 40 فیصد افراد کی ویکسی نیشن کا ہدف دیا ہے ۔ضلع ملتان میں 18 سال سے زائد عمر کی 16فیصد آبادی کی کورونا ویکسی نیشن کی جا چکی ہے ۔14 اگست تک 6لاکھ86 ہزار افراد کی ویکسی نیشن کا ہدف حاصل کرنے کے لئے ٹیمیں تشکیل دے دی گئی ہیں۔ڈپٹی کمشنر علی شہزاد کی ہدایت پر مائیکرو پلان پر عمل شروع کردیا گیا ہے ۔ ادھر سی ای او ہیلتھ ڈاکٹر شعیب الرحمن گورمانی نے بتایا کہ دو روز کے دوران 62 ہزار افراد کی ویکسی نیشن کر لی گئی ہے مہم کے دوسرے روز 35 ہزار افراد کی کورونا ویکسی نیشن کی گئی ہے ۔
