حادثات،آتشزدگی واقعات ، 10افراد شدید زخمی
ملتان( کرائم رپورٹر )ملتان کے مختلف علاقوں میں ٹریفک اور آتشزدگی کے ہونے والے تین حادثات میں لاکھوں کا سامان جل کر خاکستر جبکہ ٹریفک حادثہ کے نتیجہ میں 10 افراد زخمی ہوئے ، پہلا ٹریفک حادثہ اعوان چوک محمد والا روڈ کے قریب پیش آیا۔
جہاں مسافر کوچ علی الصبح پونے چار بجے کے قریب زیادہ دھند کے باعث سڑک سے اتر کر قریب سے گزرنے والے نالے میں جا پھنسی جس کے نتیجہ میں 10 مسافر زخمی ہو گئے جن میں بچے اور خواتین بھی شامل ہیں جنھیں ریسکیو اہلکاروں کی جانب سے بروقت طبی امداد فراہم کر دی گئی۔ دوسرا حادثہ قاسم بیلا کے علاقے میں واقعہ ایک گھر میں ہوا جہاں کمرے میں آگ لگنے سے وہاں موجود لاکھوں کا فرنیچر جل کر خاکستر ہو گیا ، تیسرے اقعے میں چوک شاہ عباس کے قریب دھاگہ تیار کرنے والی فیکٹری میں آگ لگنے سے وہاں موجود لاکھوں کا سامان جس میں کپڑا بھی شامل تھا جل کر راکھ ہوگیا تاہم آتشزدگی کے دونوں واقعات میں ریسکیو ٹیموں نے اطلاع ملتے ہی موقع پر پہنچ کر بروقت آپریشن کے ذریعے آگ پر قابو پا لیا جس کی وجہ سے وہاں موجود تما افراد محفوظ رہے ۔
