عملہ صفائی نے گٹروں کی گندگی نکال کرسڑک پر بکھیر دی
وہاڑی (خبرنگار ) میونسپل کمیٹی عملہ کی ہٹ دھرمی ڈی بلاک سے گٹروں کی صفائی کر کے نکلنے والی گندگی کھلی سڑک پر ہی بکھیر دی ،بدبو اور تعفن سے راہگیروں اور مکینوں کا سانس لینا محال تو ہوا ہی۔۔
لیکن اس گندگی کے باعث نمازیوں کا گزرنا بھی دشوار ہو گیا ،جمعہ کی نماز کیلئے مکین اور شہری ناپاکی کے ڈر سے متبادل راستہ اختیار کرنے پر مجبور ہوگئے ۔ مکینوں بلال ریاض ، عمر ، شاہد ، بشیر ، بدر ، نعمان ، شہباز و دیگر نے میونسپل کمیٹی عملہ کے خلاف احتجاج کرتے ہوئے کہا کہ بلدیہ عملہ نے گٹروں کی صفائی تو کردی لیکن نکلے والی گندگی سڑکوں پر ڈال کر ہمارے لئے اذیت بنا دیا،گھروں کے سامنے بھی گندا پانی اور گندگی جمع،شکایت کی تو عملے نے کہا تین چار دن بعد اٹھائیں گے ۔ شہریوں نے ڈپٹی کمشنر عمرانہ توقیر اور سی او میونسپل کمیٹی سے فوری نوٹس لے کر اصلاح احوال کا مطالبہ کیا ہے ۔
