معرکہ حق سے ملک کا تحفظ یقینی بنایا گیا:اجمل چانڈیہ
مظفرگڑھ (سٹی رپورٹر) جشن آزادی اور معرکہ حق کی مرکزی تقریب ڈی سی آفس میں منعقد ہوئی۔ ڈپٹی کمشنر عثمان طاہر جپہ، ایم پی اے محمد اجمل خان چانڈیہ، عون حمید ڈوگر اور ڈی پی او سید غضنفر علی شاہ نے پرچم کشائی کی، پولیس کے چاق و چوبند دستے نے سلامی دی۔ مولانا عبدالمعبود آزاد نے ملکی سلامتی کی دعا کرائی۔
اللہ والے چوک پر سبز و سفید غبارے چھوڑے گئے جبکہ ضلع کونسل ہال میں طلباء و طالبات نے ملی نغمے ، ٹیبلو، قومی ترانے اور تقاریر پیش کیں۔اس موقع پر ڈپٹی کمشنر عثمان طاہر جپہ نے کہا کہ وزیر اعلیٰ پنجاب مریم نواز کی ہدایت پر 14 روزہ تقریبات منعقد ہوئیں۔ معرکہ حق نے پاکستان کو عزت بخشی، اب دنیا کی کوئی طاقت پاکستان کی طرف میلی آنکھ سے نہیں دیکھ سکتی۔ 6اور 7مئی کی درمیانی رات پاک فوج نے دشمن کے غرور کو خاک میں ملایا، ہماری سرحدیں، فضا اور سمندر محفوظ ہیں۔ یہ ملک قربانیوں سے حاصل ہوا ہے ، اس کی حفاظت ہم سب کی ذمہ داری ہے ۔ڈی پی او سید غضنفر علی شاہ نے کہا کہ طلباء کی پرفارمنس نے 1947کی یاد تازہ کی۔ آج کا دن شکر گزاری اور فخر کا ہے کہ پاک فوج نے پوری قوم کے ساتھ مل کر آزادی کا تحفظ کیا۔ ہمیں عہد کرنا ہوگا کہ ملک کو برائیوں سے پاک اور ترقی کی راہ پر گامزن کریں۔ایم پی اے محمد اجمل خان چانڈیہ نے کہا کہ معرکہ حق میں پاک فوج اور قوم دشمن کے سامنے سیسہ پلائی دیوار بنی، معرکہ حق سے ملک کا تحفظ یقینی بنایا گیا۔ فیلڈ مارشل عاصم منیر کی قیادت میں دشمن کے عزائم ناکام بنائے گئے ۔ ملک ترقی پسند قیادت کے ہاتھ میں ہے ، ہر فرد کو ترقی کے لیے کردار ادا کرنا ہوگا۔ آخر میں ریلی نکالی گئی جس میں سرکاری گاڑیاں اور موٹر سائیکل سوار شریک ہوئے ۔ ڈپٹی کمشنر عثمان طاہر جپہ نے تقریب میں شریک بچوں میں پاکستان کے پرچم اور پرچم والی ٹوپیاں تقسیم کیں اور بچوں کے ساتھ تصاویر بھی بنوائیں ۔
