ہیٹ ویو بڑھنے کا خدشہ، پی ڈی ایم اے نے ایڈوائزری جاری کر دی
لاہور:( دنیا نیوز) موسم گرما میں درجہ حرارت بڑھنے، ہیٹ ویو میں اضافے کا خدشہ ہے، پی ڈی ایم اے پنجاب نے متعلقہ اداروں کو گائیڈ لائنز جاری کردیں۔
پنجاب ڈیزاسٹر مینجمنٹ اتھارٹی (پی ڈی ایم اے) نے ضلعی انتظامیہ کو ایک ہدایت نامہ جاری کیا ہے جس میں ہنگامی صورتحال سے نمٹنے کیلئے الرٹ رہنے کا کہا گیا ہے۔
ڈی جی پی ڈی ایم اے کے ہدایت نامہ میں کہا گیا کہ رواں ماہ پنجاب میں درجہ حرارت میں 4 سے 7 ڈگری تک اضافے کا خدشہ ہے، صوبہ کے بڑے شہر میدانی علاقے اور خصوصاً جنوبی پنجاب کے اضلاع گرمی کی شدید لپیٹ میں آ سکتے ہیں۔
ڈی جی عرفان علی کاٹھیا کا کہنا ہے کہ ہیٹ ویو سے بچاؤ کیلئے حفاظتی اقدامات کیے جا رہے ہیں، ڈپٹی کمشنرز کو عوامی مقامات پر ہیٹ ویو سے بچاؤ کی سہولیات یقینی بنانے کی ہدایت کر دی ہے۔
ہدایت نامے میں ضلعی انتظامیہ کو ہیلپ لائن نمبرز اور مساجد میں اعلانات کے ذریعے عوامی آگاہی مہم چلانے کی ہدایت کی گئی، جس میں کہا گیا کہ پرنٹ، الیکٹرانک اور سوشل میڈیا کے ذریعے شہریوں کو ہیٹ ویو کے خطرات سے آگاہ کریں۔
پی ڈی ایم اے پنجاب نے محکمہ سکول ایجوکیشن کو بچوں کی آؤٹ ڈور سرگرمیوں پر پابندی کے احکامات جاری کئے ہیں جبکہ محکمہ تعلیم کو سکولوں کے انٹری پوائنٹس پر ہیٹ ویو سے بچاؤ کے بارے فلیکسز لگانے کی ہدایت کی گئی ہے۔
جاری ہدایت نامے میں کہا گیا کہ کسانوں کو ہیٹ ویو کے فصلوں پر اثرات سے متعلق آگاہی دی جائے، لوکل گورنمنٹ ڈیپارٹمنٹ عوامی اجتماع والی جگہوں پر پانی کی فراہمی یقینی بنائے، بس اڈوں اور ریلوے سٹیشنز پر بینرز کے ذریعے شہریوں کو ہیٹ ویو بارے آگاہی دی جائے۔
ڈی جی پی ڈی ایم اے نے ویٹرنری انتظامیہ سے کہا کہ کیئر سینٹرز کو 24 گھنٹے فعال رکھا جائے، جانوروں کی منڈیوں کے مقامات پر صاف پانی کی فراہمی یقینی بنائیں۔
ڈیزاسٹر مینجمنٹ نے محکمہ صحت کو ہدایت جاری کی کہ ہسپتالوں میں ہیٹ ویو کاؤنٹر قائم کرے، ہیٹ ویو سے متاثرہ افراد کی ابتدائی طبی امداد کیلئے ادویات کی دستیابی یقینی بنائی جائے۔
جاری ایڈوائزری میں عوامی مقامات پر موبائل ہیلتھ یونٹس اور مستقل بنیادوں پر میڈیکل کیمپس لگانے کی بھی ہدایت کی گئی، شہری سے کہا گیا ہےکہ ہیٹ ویو کے دوران غیر ضروری سفر سے گریز کریں، دھوپ میں سر کو ڈھانپ کر رکھیں، پانی کا استعمال زیادہ سے زیادہ کریں۔
پی ڈی ایم اے کی طرف سے جاری ہدایت نامے میں کہا گیا ہے کہ بچوں بزرگوں اور بیمار افراد کا خصوصی خیال رکھیں، دل کے عارضہ میں مبتلا افراد خصوصی احتیاط کریں، دھوپ میں باہر نہ نکلیں۔
