روس:8.8شدت کا زلزلہ،کئی ملکوں میں سونامی الرٹ،ایمرجنسی ،ہزاروں افراد کی نقل مکانی
ماسکو(دنیا مانیٹرنگ)روس کے علاقے کامچاٹکا میں بدھ کی دوپہر آنے والے 8.8 شدت کے زلزلے نے تباہی مچا دی، آفٹر شاکس کا سلسلہ جاری۔۔
، روس کے مشرقی ساحلی علاقوں سے سونامی کی لہریں ٹکرا نے کے بعد کئی ملکوں میں سونامی الرٹ جاری کردیا گیا، ایمرجنسی نافذ، ہزاروں افراد کی نقل مکانی۔تفصیلات کے مطابق روس کے مشرقی علاقے میں زلزلے کا مرکز صرف 20 کلومیٹر اور گہرائی 150 کلومیٹر تھی،کامچاٹکا میں ایئرپورٹ پر کچھ لوگوں کے زخمی ہونے کی اطلاعات ہیں، سیویرو کورلسک کے قصبے میں متعدد گھر سونامی میں بہہ گئے ، 2 ہزار 700 افراد کو محفوظ مقام پر منتقل کیا گیا۔روسی وزیر کے مطابق زلزلے کے بعد کامچاٹکا کے مختلف حصوں میں 3 سے 4 میٹر اونچی سونامی لہریں ریکارڈ کی گئیں۔زلزلے سے چند افراد کے زخمی ہونے کی اطلاعات بھی ہیں جبکہ ممکنہ سونامی لہروں کے پیش نظر بحرالکاہل میں ایڈوائزری جاری کردی گئی۔کامچاٹکا کے ساحل پر ایک گھنٹے میں 5 کی شدت کے ساتھ کل آٹھ زلزلے آئے ، زلزلے کے جھٹکے 7 سے 100 کلومیٹر کی گہرائی میں آئے۔
، ماہرین نے کم از کم ایک ماہ تک 7.5 کی شدت کے آفٹر شاکس کی پیش گوئی کی ہے ۔اس کے علاوہ انڈونیشیا، جاپان ،چین ، آسٹریلیا ،تائیوان اور فلپائن نے بھی ایمرجنسی وارننگ جاری کر دی ہے ، امریکا نے کیلی فورنیا، اوریگن اور واشنگٹن میں بھی سونامی وارننگ جاری کر دی، اس کے علاوہ برٹش کولمبیا، ہوائی، الاسکا کیلئے بھی سونامی وارننگ جاری کی گئی ہے ، ہوائی میں تمام تجارتی جہازوں اور بندرگاہوں کو خالی کرنے کا حکم دے دیا گیا ہے ۔امریکی جیولوجیکل سروے کے مطابق جاپان میں 20 لاکھ افراد کو سونامی کے باعث انخلا کی وارننگ جاری کر دی گئی،220 شہروں اور قصبوں کیلئے ایڈوائزری جاری کی گئی ہے اورخبردار کیا ہے کہ سونامی کی لہریں ایک دن سے زیادہ جاری رہ سکتی ہیں۔ہوائی میں حکام نے انخلا کی تیاریاں شروع کر دیں، گیس سٹیشنوں پر لوگوں کی لمبی قطاریں لگ گئیں، مشرقی جاپان میں ریلوے سروس معطل کر دی گئی، احتیاطی تدابیر اختیار کرتے ہوئے فوکوشیما ایٹمی مرکز کو خالی کروالیا گیا، فلپائن میں بھی لوگوں کو ساحل پر نہ جانے کی ہدایت کی گئی ہے ۔واضح رہے کہ 20 جولائی کو بھی روس میں 5.0 اور 6.7 شدت کے زلزلے آئے تھے جن پر سونامی کا الرٹ جاری نہیں کیا گیا تھا، تاہم بعد ازاں 7.4 شدت کا زلزلہ 08:49 جی ایم ٹی پر ریکارڈ کیا گیا، جس کے بعد USGS نے خبردار کیا کہ ‘کچھ ساحلی علاقوں کے لئے خطرناک سونامی لہروں کی پیش گوئی کی گئی ہے ’۔ادارے نے بتایا تھا کہ روسی ساحلوں پر 30 سینٹی میٹر سے ایک میٹر (تقریباً 3.3 فٹ) تک بلند لہریں پہنچنے کا خدشہ ہے ، جبکہ جاپان اور امریکی ریاست ہوائی میں 30 سینٹی میٹر (ایک فٹ)سے کم اونچی لہروں کی توقع ہے ۔USGS نے بتایا تھا کہ زلزلے کا مرکز بحرالکاہل میں پیٹروپاولووسک کامچاتسکی شہر سے تقریباً 150 کلومیٹر (93 میل)مشرق میں واقع تھا۔بتایا گیا کہ کامچاٹکا کے ساحل پر آنے والا 8.8 شدت کا زلزلہ اس علاقے میں 1952 کے بعد کا سب سے طاقتور زلزلہ ہے ، زلزلے نے عمارتوں کو نقصان پہنچایا اور 4 میٹر (13 فٹ)تک بلند سونامی لہریں پیدا کیں۔
