حکومتِ پنجاب کیساتھ کامیاب مذاکرات کے بعد پاکستان گڈز ٹرانسپورٹ الائنس نے پانچ روز کے بعد اپنی ہڑتال ختم کر دی ہے۔ ملکی معیشت کیلئے یہ اچھی خبر ہے۔گڈز ٹرانسپورٹ کی ہڑتال کی وجہ سے صنعت‘ تجارت‘ برآمدات اور ملک بھر میں رسد کے نظام میں شدید خلل پیدا ہوا ۔ ٹیکسٹائل ایکسپورٹرز ایسوسی ایشن کے مطابق ہڑتال کے باعث برآمدی آرڈر بروقت نہ پہنچنے کی وجہ سے اس شعبے کو پانچ دن میں 20کروڑ ڈالر سے زائد کا نقصان ہوا۔ صنعتی خام مال کی عدم دستیابی نے دیگر شعبوں کی پیداوار اور برآمدی آرڈرز کی بروقت ترسیل کو بھی متاثر کیا۔ گڈز ٹرانسپورٹ الائنس کی طرف سے یہ ہڑتال پنجاب میں نئے ٹریفک آرڈیننس کے نفاذ کے بعد ٹریفک قوانین کی خلاف ورزیوں پر بھاری جرمانوں اور مقدمات کے اندراج جیسے سخت اقدامات کیخلاف کی گئی تھی۔

قبل ازیں یہ بھی دیکھنے میں آیا ہے کہ حکومت کی طرف سے بڑی مال بردار گاڑیوں کو پکڑ کر کئی کئی روز تک سڑکوں پر کھڑا کر دیا جاتا ہے جس سے نہ صرف ٹرانسپورٹرز کا نقصان ہوتا ہے بلکہ رسد کے نظام میں بھی شدید خلل پیدا ہوتا ہے۔ یہ اقدام براہِ راست ملکی معیشت کو متاثر کرتا ہے۔ قومی معیشت کی موجودہ نازک صورتحال میں چھوٹے چھوٹے اقدامات بھی بڑے نقصانات کا سبب بن سکتے ہیں‘ اس لیے حکومت کو ہر قدم سوچ سمجھ کر اٹھانا چاہیے۔

روزنامہ دنیا ایپ انسٹال کریں