زینب جمیل پر قاتلانہ حملے میں ملوث 5 ملزم گرفتار
لاہور(شوبزڈیسک)سابقہ اداکارہ و ماڈل زینب جمیل پر قاتلانہ حملے میں ملوث 5 ملزموں کو گرفتار کرلیا گیا، ایس پی کینٹ اویس شفیق کی ہدایت پر ملزموں کی گرفتاری کے لیے ٹیم تشکیل دی گئی تھی۔
ایس ایچ او ساؤتھ کینٹ عمران خان، ایس ایچ او ڈیفنس بی داؤد احمد نے پولیس ٹیم کے ہمراہ جدید ٹیکنالوجی کی مدد سے ملزموں ضیاء الرحمٰن، جاوید اقبال، عادل، طیب اور رضا شامل کو گرفتار کیا۔ اس حوالے سے ایس پی کینٹ اویس شفیق نے بتایا کہ دوران تفتیش سینکڑوں کیمروں کی فوٹیجز چیک کی گئیں، ضیاء نامی ملزم نے شوٹرز کو موٹر سائیکل اور اسلحہ فراہم کیا۔ ضیاء ہی شوٹرز کو موقع پر لایا اور فائرنگ کے بعد واپس لیکر گیا، شوٹرز ہوائی جہاز پر کراچی سے لاہور آئے اور براستہ سڑک واپس گئے ۔ ملزم ضیاء کا زینب جمیل کے شوہر سردار جمیل کے ساتھ 55 لاکھ لین دین کا معاملہ ہے جبکہ سردار جمیل 30 جون تک ضمانت پر ہے۔
