شاہ رخ خان کا 33 سالہ انتظار ختم، پہلانیشنل فلم ایوارڈ مل گیا
ممبئی (شوبزڈیسک )بالی ووڈ کے شہنشاہ کہلائے جانے والے اور تین دہائیوں سے زائد عرصے تک فلمی دنیا پر راج کرنے والے شاہ رخ خان کو آخرکار ان کی اداکاری کا سب سے بڑا قومی اعزاز ‘‘نیشنل فلم ایوارڈ’’ مل گیا۔۔
شاہ رخ خان نے 1992 میں فلم ‘دیوانہ’ سے بالی وڈ میں قدم رکھا اور متعدد بلاک بسٹر فلمیں دیں ۔ اگرچہ انہیں کئی بین الاقوامی اعزازات اور فلمی ایوارڈز ملے ، لیکن بھارت کے سب سے بڑے فلمی اعزاز ‘نیشنل ایوارڈ’ سے وہ اب تک محروم تھے ۔مگر اب یہ انتظار ختم ہوچکا ہے ۔ بھارتی میڈیا کی رپورٹس کے مطابق شاہ رخ خان کو 2023 میں ریلیز ہونے والی فلم ‘جوان’ میں بہترین اداکاری پر نیشنل فلم ایوارڈ سے نوازا گیا ہے ۔ یہ اعلان بھارت کے 71ویں نیشنل فلم ایوارڈز کے موقع پر یکم اگست کو کیا گیا۔ دلچسپ بات یہ ہے کہ شاہ رخ خان کو یہ ایوارڈ وکرانت میسی کے ساتھ مشترکہ طور پر دیا گیا ہے ، جنہوں نے فلم ‘بارہویں فیل’ میں بے مثال اداکاری کا مظاہرہ کیا تھا۔اسی تقریب میں معروف اداکارہ رانی مکھرجی کو بھی فلم ‘مسز چیٹرجی’ میں بہترین اداکاری پر نیشنل ایوارڈ دیا گیا۔شاہ رخ خان نے اس اعزاز کے ملنے پر انسٹاگرام پر ایک ویڈیو شیئر کی، جس میں انہوں نے حکومتِ بھارت اور اپنے مداحوں کا دل سے شکریہ ادا کیا۔ ویڈیو میں ان کے چہرے پر خوشی اور فخر صاف دکھائی دے رہا تھا۔
