بیگمات کے نام پر پیسے وصول کرنیوالے 8افسر گرفتار
جی بی کے 42افسران نے 42لاکھ وصول کیے ،باقی کی گرفتاری کیلئے ٹیمیں تشکیل
گلگت (اے پی پی)گلگت بلتستان میں گزشتہ 8 سال سے بیگمات کے نام پر بے نظیر انکم سپورٹ پروگرام سے پیسے وصول کرنیوالے 42 سرکاری اہلکاروں اور عہدیداروں میں سے 8 کو ایف آئی اے کی ٹیم نے گلگت سے گرفتار کرکے مقدمات درج کر لیے ہیں،باقی ماندہ آفیسرز کی گرفتاری کے لیے چھاپہ مار ٹیمیں تشکیل دے دی گئی ہیں ،ایف آئی اے ذرائع نے اے پی پی کو بتایا کہ ملزمان میں محکمہ تعلیم، صحت اور اے جے پی آر سے گریڈ17سے لیکر گریڈ 21 تک کے 42 آفیسرز شامل ہیں جو اپنی بیگمات کے نام پر آٹھ سال میں 42 لاکھ سے زائد رقم وصول کرچکے ہیں،ایف آئی اے ٹیم نے نادرا ریکارڈ اور بی آئی ایس پی ریکارڈ کی مدد سے ملوث افسران کے خلاف مقدمات درج کیے ہیں،ذرائع نے بتایا ہے کہ حالیہ ماہ محکمہ تعلیم ،صحت اور پولیس سمیت نجی بینک کے گریڈ 17 سے گریڈ 21 کے عہدیداروں سے تقریباً 7 لاکھ روپے ریکوری کی گئی جبکہ ان کے نام صیغہ راز میں رکھے جا رہے ہیں، وصول شدہ رقم بی آئی ایس پی پروگرام کے اکائونٹس میں جمع کی جا رہی ہے ۔
