سندھ ڈاکوؤں،پختونخوا کا لعدم ٹی ٹی پی کے حوالے ،الیکشن مہم کیسے چلائیں گے:فضل الرحمٰن
ڈیر ہ اسماعیل خان ( این این آ ئی)جے یو آئی کے مرکزی امیر مولانا فضل الرحمن نے کہا کہ سندھ ڈاکوئوں کے اور کے پی کے کالعدم ٹی ٹی پی کے حوالے ہے ۔
سیاسی عدم استحکام میں معیشت مستحکم نہیں ہوسکتی،سربراہ پی ٹی آئی ،باجوہ ،فیض حمید نے ٹرمپ آفس میں بیٹھ کر مقبوضہ کشمیر بھارت کے حوالے کرنے کا فیصلہ کیا اب قوم کو دھوکا دینے کیلئے ٹسوے بہا رہے ہیں ،فوج کو فاٹا میں آپریشن کی اجازت دینے والے آج فوج کیخلاف نعرے بازی کر کے اپنا چورن بیچ رہے ہیں،افغانستان اور پاکستان باہمی اختلافات مل بیٹھ کر حل کریں ۔ اسلام انسانی حقوق کا علمبردار ہے ،کسی سے ڈکٹیشن لینے کی ضرورت نہیں ۔ انہوں نے یہ بات مفتی محمود مرکز پشاور میں جے یو آئی کی مجلس شوریٰ و عمائدین جمعیت کے مشترکہ اجلاس سے خطاب کرتے ہوئے کہی ۔ اجلاس کی صدارت صوبائی امیر سینیٹر مولانا عطاالرحمن نے کی ۔فضل الرحمن نے کہا کہ مسلمان کے خون کو حلال قرار دیکر قتل کرنا حرام ہے ، باجوڑ دھماکا کرنیوالے اسلام مخالف لوگوں کے ایجنٹ ہیں، پشتونوں کو مذہب سے بیزار کرنے کیلئے چیئرمین پی ٹی آئی کو لایا گیا ،ملک سے انگریز تو چلا گیا مگر تابعداری و پیروی نہیں گئی ۔انہوں نے کہا ہے کہ مفتی محمود ؒکانفرنس صوبے کی سیاست میں سنگ میل ثابت ہو گی ۔ صوبے میں ہر طرف بدامنی پھیلی ہوئی ہے ایسی صورتحال میں انتخابی مہم کیسے چلائینگے ، ہماری چیزوں کی قیمتوں کا تعین آئی ایم ایف کرتا ہے ٹیکس بھی وہ بڑھاتا ہے ،چیئرمین پی ٹی آئی کے آئی ایم ایف سے معاہدہ کرنے کی وجہ سے پاکستانیوں کو یہ دن دیکھنے پڑے ۔ ہم نے ڈیڑھ سال میں ملک کو دیوالیہ ہونے سے بچایا۔ انہوں نے کہا کہ امریکا کا اثرورسوخ کم کرنے کیلئے عوام کو جے یوآئی کا ساتھ دینا ہوگا۔
