قیدی نمبر 804سے حساب مانگنے میں کیا غلط :امیر حیدر ہوتی
پشاور(نیوز ایجنسیاں، مانیٹرنگ ڈیسک)عوامی نیشنل پارٹی کے مرکزی رہنما امیر حیدر ہوتی نے کہا ہے کہ ملک میں جو حالات ہیں پہلے کبھی ایسے نہیں تھے۔
کسی اور کی لڑائی میں ہمارا خون بہایا جارہا ہے ۔بہت تجربے ہوچکے ، پرائی جنگ مزید مسلط نہ کی جائے ۔ ہمیں مارا گیا اور پھر ساتھ میں بدنام بھی کیا گیا۔پشاور میں ورکرز کنونشن سے خطاب کرتے ہوئے امیر حیدر ہوتی کا کہنا تھا کہ یہ تاثر دیا جارہا ہے کہ خیبرپختونخوا میں صرف بجلی چوری ہوتی ہے۔ صوبے میں پیدا ہونیوالی بجلی کا یونٹ 4 روپے سے مہنگا نہیں ملنا چاہیے ان کا کہنا تھا کہ بجلی کی اصل قیمت کے حساب سے یونٹ چارج کیا جائے۔ جس صوبے میں گیس اور بجلی پیدا ہوگی اس پر پہلا حق اسی صوبے کا ہے، خیبرپختونخوا میں بجلی لوڈشیڈنگ آئین کی خلاف ورزی ہے ،ہم پر چوری کا الزام لگانے والے پہلے ہمارے ساتھ حساب کرلیں۔ اصل چور وہ ہیں جو چار روپے فی یونٹ والی بجلی چالیس روپے میں ہمیں فروخت کررہے ہیں،چیئرمین پی ٹی آئی کا نام لیے بغیر رہنما اے این پی کا کہنا تھا کہ قیدی نمبر 804 جب حکومت میں تھے تو بے گناہ لوگوں کو گرفتار کرکے ذلیل کیا جاتا تھا۔ قیدی نمبر 804 نے سب سے حساب مانگا اب اگر ان سے مانگا جارہا ہے تو اس میں کیا غلط ہے ۔ انہوں نے عوام اور فوج کی لڑائی کو پلان کیا۔ امیر حیدر خان ہوتی نے کہا کہ اے این پی کے ساتھ جتنی زیادتیاں کی گئی ہیں اسکا کوئی تصور بھی نہیں کرسکتا۔
