یوٹیلیٹی سٹورز پرآٹا،چینی اورچاول مارکیٹ سے مہنگے فروخت
لاہور(اپنے کامرس رپورٹر سے )یوٹیلیٹی سٹورز پر آٹا، چینی اور چاول عام مارکیٹ سے مہنگے داموں فروخت ہونے لگے ۔دستاویزات کے مطابق یوٹیلیٹی سٹورز پر 20 کلو آٹے کا تھیلا 2840 روپے میں فروخت کیا جا رہا ہے جبکہ عام مارکیٹ میں 20 کلو آٹا 2792 روپے میں مل رہا ہے ۔
سیلا چاول یوٹیلیٹی سٹورز پر 53.40 روپے مہنگا ہے ، عام مارکیٹ میں سیلا چاول 317 روپے فی کلو دستیاب ہے جبکہ یوٹیلیٹی سٹورز پر فی کلو سیلا چاول 370 روپے کا ہے ۔سفید چنے بھی عام مارکیٹ کی نسبت یوٹیلیٹی سٹورز پر 13.53 روپے مہنگے فروخت کیے جا رہے ہیں، مارکیٹ میں سفید چنا 391 روپے فی کلو ہے جبکہ یوٹیلیٹی سٹورز پر سفید چنا 405 روپے میں دستیاب ہے ۔اس کے علاوہ یوٹیلیٹی سٹورز پر چینی بھی عام مارکیٹ کی نسبت 9 روپے مہنگی بیچی جا رہی ہے ، یوٹیلیٹی سٹورز پر چینی کی قیمت 155 روپے فی کلو ہے جو مارکیٹ میں 146 روپے کلو کے حساب سے حاصل کی جا سکتی ہے ۔
