کالعدم ٹی ٹی پی سرغنہ کیخلاف قانونی چارہ جوئی کا فیصلہ
اسلام آباد(خصوصی نیوز رپورٹر)حکومت نے کالعدم ٹی ٹی پی کے سرغنہ نور ولی محسود کیخلاف سخت قانونی چارہ جوئی کا فیصلہ کر لیا،افغانستان میں روپوش ٹی ٹی پی کے سربراہ نور ولی محسود کی ایک مبینہ آڈیو لیک سامنے آئی تھی جس میں وہ پاکستان میں دہشتگردی کی ہدایات دے رہا تھا۔
ذرائع کے مطابق خفیہ کال ریکارڈنگ میں نور ولی محسود اپنے دہشت گرد احمد حسین عرف غٹ حاجی کو ہسپتالوں، سرکاری املاک اور سکولوں کو دھماکے سے اڑانے کی ہدایات دے رہا ہے جبکہ ڈی آئی خان میں ہیلتھ سنٹر پر حملہ بھی اسی کی کڑی ہے ،میڈیا پر خبر آنے کے بعد شدید عوامی رد عمل کے نتیجے میں دہشتگرد ٹولے نے خفیہ کال کو اے آئی جنریٹڈ قرار دے کر راہ فرار کی کوشش کی،متعلقہ حکام نے نور ولی محسود اور غٹ حاجی کی خفیہ آڈیو لیک کا آفیشل فرانزک کروانے کا فیصلہ کیا ہے ، فرانزک رپورٹ کے بعد نور ولی اور غٹ حاجی کے خلاف ملک کے اندر اور باہر سخت قانونی چارہ جوئی کی جائے گی، نور ولی محسود کی افغانستان میں موجودگی اور پاکستان میں براہ راست دہشتگردی کروانے پر افغان عبوری حکومت سے احتجاج بھی کیا جائے گا،افغان طالبان سے دہشتگردوں کو پاکستان کے خلاف مسلسل دہشت گردی اور سنگین جرائم کرنے پر پاکستان کے حوالے کرنے کا مطالبہ بھی کیا جائے گا، افغان عبوری حکومت اس ٹولے کی دہشتگردانہ سرگرمیاں روکنے میں ناکام ہو چکی ہے ، دہشت گردی کی لعنت کو جڑ سے اکھاڑنے کیلئے پاکستان ہر ممکن حد تک جائے گا۔
