190ملین پاؤنڈ ریفرنس ،اعظم خان پروکلا صفائی کی جرح مکمل
اسلام آباد،راولپنڈی (اپنے نامہ نگارسے ،خبرنگار)احتساب عدالت کے جج محمد علی وڑائچ کی عدالت میں زیر سماعت بانی پی ٹی آئی اور بشریٰ بی بی کے خلاف 190ملین پاؤنڈ ریفرنس میں بشریٰ بی بی اور بانی چیئرمین پی ٹی آئی عمران خان کے وکلا نے سابق پرنسپل سیکرٹری اعظم خان پر جرح مکمل کرلی ۔
سابق وزیر اعلیٰ کے پی کے پرویز خٹک اور سابق وفاقی وزیر زبیدہ جلال پر بانی پی ٹی آئی کے وکیل ظہیر عباس چودھری نے جرح مکمل کرلی، تاہم دونوں پر بشریٰ بی بی کے وکیل عثمان گل آئندہ سماعت پر جرح کریں گے ۔احتساب عدالت کے جج محمد علی وڑائچ کے روبرو سماعت میں عمران خان اور بشریٰ بی بی کمرا عدالت میں موجود تھے ۔ نیب کی جانب سے امجد پرویز سردار مظفر عباسی اور نیب لیگل ٹیم جبکہ ملزموں کی جانب سے چودھری ظہیر عباس عدالت میں پیش ہوئے ، بشریٰ بی بی کے وکیل عثمان ریاض گل عدالت میں نہیں آئے ۔عدالت نے آئندہ سماعت پر استغاثہ کے مزید دو گواہوں کو بیانات ریکارڈ کرانے کیلئے طلب کرلیا۔ سماعت کے دوران بانی پی ٹی آئی کو انگریزی روزنامہ فراہم کرنے کی درخواست دائرکی گئی،عدالت نے ریفرنس کی سماعت کل 22 جولائی تک کیلئے ملتوی کر دی۔ اب تک ریفرنس میں 33گواہوں کے بیان ریکارڈ ہو چکے ہیں جبکہ ملزموں کے وکلا نے 32گواہوں پر جرح کی کارروائی بھی مکمل کر لی ہے ۔
