بجلی بل کیسے ادا کروں ؟ 2اور شہریوں نے خود کشی کرلی
علی پور چٹھہ،پیرمحل(تحصیل رپورٹر،نمائندہ دنیا) بھاری بجلی بلوں کی عدم ادائیگی پردو اور شہریوں نے خود کشی کرلی ۔ علی پورچٹھہ کے نواحی علاقے کیلاسکے کے رہا ئشی 70سالہ صادق بٹ کی گھر میں اکثر ناچا قی رہتی تھی۔
گزشتہ روز بجلی بل ادائیگی بارے کافی جھگڑا ہوا تو وہ دلبرداشتہ ہو کر گھر سے نکل گیا اورنہر لوئر چناب کے پل پر کھڑا ہو کر نہر میں چھلانگ لگا دی۔ راہگیروں نے ریسکیو 1122کو اطلاع دی کہ معمر شخص نے خودکشی کر لی ہے جس پر ریسکیو ٹیموں نے موقع پر پہنچ کر لاش تلاش کرکے پولیس تھانہ علی پورچٹھہ کے حوالے کردی ۔ بی پلاٹ پیرمحل کے رہائشی عاطف ولد عبدالقیوم نے بجلی کا بل ادانہ ہونے اور معاشی حالات سے تنگ آکر زہریلی گولیاں نگل کر زندگی کا خاتمہ کرلیا، متوفی 3 بچوں کا باپ تھا اورکرایہ کے مکان میں اپنے بیوی بچو ں کے ہمراہ رہائش پذیر تھا۔ واضح رہے کہ بھاری بجلی بل کے معاملے پرچندروزقبل گوجرانوالہ کے علاقے میں معمرخاتون نے نالے میں کودکرزندگی ختم کرلی تھی جبکہ بڑے نے چھوٹے بھائی کی جان لے لی تھی ۔
