موجودہ اسمبلیوں کی کوئی حیثیت نہیں:مولانافضل الرحمن
پشاور(مانیٹرنگ ڈیسک)جے یو آئی کے سربراہ مولانا فضل الرحمٰن کا کہنا ہے کہ موجودہ اسمبلیوں کی کوئی حیثیت نہیں، ایسی اسمبلیاں تو میں خود مٹی سے بنا سکتا ہوں، ہمیں ایسے انتخابات سے نہ ٹرخایا جائے ، ایسے الیکشن تو حسینہ واجد نے بھی کرائے تھے ان کا کیا حال ہوا۔
خیبر پختونخوا میں حکومت نام کی کوئی چیز نہیں ،حکومت نااہل لوگوں کے پاس ہے ، ہمارا صوبہ آگ میں جل رہا ہے ۔ چارسدہ میں تقریب سے خطاب کرتے ہوئے انہوں نے کہا یہ ملک کسی کی جاگیر نہیں، ملک بناتے وقت اسلام کے نام پر لوگوں نے قربانیاں دیں۔ ہم امن چاہتے ہیں، ہم آج تک آپ سے نرم لہجے اور دلیل سے بات کرتے ہیں۔ہم چاہتے ہیں آپ ہماری بات سمجھیں، اگر نہیں سمجھتے تو کل آپکا گریبان اور ہمارا ہاتھ ہو گا۔انہوں نے کہا 26 ویں آئینی ترمیم پر ہم سے آنکھیں بند کر کے منظوری کا مطالبہ کیا گیا، اگر وہ مسودہ پاس ہوتا تو پارلیمنٹ کی کوئی حیثیت نہ رہتی، ہم نے ایک ماہ مذاکرات کر کے 36 شقیں نکلوائیں۔ ہماری کوشش سے یکم جنوری 2028 سے پاکستان سے سودی نظام ختم ہو جائے گا ،ہم نے آئین میں انسانی حقوق کا تحفظ کیا، آج سیاست کا مقصد کرسی اور اقتدار کا حصول ہے ، خیبر پختونخوا میں مذہب کی گہری جڑیں اکھاڑنے کیلئے این جی اوز کو استعمال کیا گیا، مدارس، علوم اور سیاست کی حفاظت ہماری ذمے داری ہے ۔
