ایف بی آر کیلئے گاڑیا ں ضروری،شفافیت یقینی بنائینگے :وزیر خزانہ
اسلام آباد(آئی این پی)وزیر خزانہ محمد اورنگزیب نے کہا ہے کہ ایف بی آر حکام کو گاڑیاں فراہم کیا جانا اہم ضرورت ہے ، گاڑیوں کی خریداری میں شفافیت کو یقینی بنائیں گے ۔
وزیر خزانہ نے کہا کہ ایف بی آر اہلکار دفتروں میں بیٹھ کر کام جاری نہیں رکھ سکتے ، ٹیکس وصولی بہتر کرنے کیلئے افسروں کو فیلڈ میں جانا پڑے گا۔ گاڑیاں فراہم کرنے والی تمام کمپنیاں پاکستانی ہیں، کسی کمپنی کے ساتھ زیادتی نہیں ہونے دیں گے ۔خیال رہے کہ سینیٹ کی قائمہ کمیٹی برائے خزانہ کے چیئرمین سلیم مانڈوی والا نے وزیر خزانہ کو ایف بی آر افسروں کیلئے گاڑیوں کی خریداری روکنے کیلئے گزشتہ روز خط لکھا تھا۔اپنے خط میں ان کا کہنا تھا کہ خریداری کے عمل میں شفافیت پر سمجھوتا کیا گیا، پرچیز آرڈر کینسل کیا جائے ۔ ایف بی آر کی طرف سے 1010 گاڑیاں خریدنے پر سینیٹ کمیٹی کو تحفظات ہیں، کمیٹی ممبران نے گاڑیوں کی خریداری میں اوپن بڈنگ نہ ہونے پر شدید تحفظات کا اظہار کیا ہے ۔ گاڑیوں کی خریداری کے عمل کو مس مینجمنٹ اور ممکنہ بدنیتی سمجھا گیا، خریداری میں شفافیت کو یقینی بنانا بنیادی اصول ہے ۔