پانی کی قلت گھروں میں گاڑیاں دھونے پر 10 ہزار جرمانہ کریں:لاہور ہائیکورٹ
لاہور (کورٹ رپورٹر)لاہور ہائیکورٹ نے گھروں میں گاڑیاں دھونے والوں کو دس ہزار روپے جرمانہ اور واٹر ری سائیکل پلانٹ نہ لگانے والے پٹرول پمپس کو ایک لاکھ جرمانہ کرنے کی ہدایت کردی ۔۔۔
جسٹس شاہد کریم نے کرکٹ میچز کے دوران لاہور میں مناسب ٹریفک پلان نہ ہونے پر سی ٹی او لاہور کو ذاتی حیثیت میں طلب کر لیا ۔ لاہور ہائیکورٹ کے جسٹس شاہد کریم نے گزشتہ روز سموگ کے تدارک کے حوالے (صفحہ9بقیہ نمبر6)سے کیس کی سماعت کی اورمختلف محکموں نے اپنی رپورٹس پیش کیں ۔ممبر جوڈیشل کمیشن حنا حفیظ نے بتایا کہ پانی کو محفوظ کرنے کے حوالے سے چیف سیکرٹری سے میٹنگز ہوئی ہیں اور اقدامات تجویز کئے جارہے ہیں ۔عدالت نے استفسار کیاکہ واٹر اتھارٹی بنانے کی تجویز دی تھی اسکا کیا بنا؟، پانی کا مسئلہ صرف لاہور نہیں بلکہ پورے پنجاب کا ہے اچھی بات ہے کہ حکومت نے پورے پنجاب کو فوکس کیا ہوا ہے ۔ جسٹس شاہد کریم نے ریمارکس دئیے کہ گھروں میں گاڑیاں دھونا بند ہو جائے تو آدھا پانی بچایا جاسکتا ہے ، جو گھروں میں گاڑیاں دھوئے اسے دس ہزارروپے جرمانہ کریں اور جس پٹرول پمپ پر واٹر ری سائیکل پلانٹ نہ ہو اسے سیل کریں اور ایک لاکھ روپے جرمانہ کریں ،آ ج کل کے دور میں ہزار دو ہزار کیا کہتا ہے جرمانے بڑھائیں سب سیدھے ہو جائیں گے ۔جسٹس شاہد کریم نے مسجدوں میں پانی کے ضیاع پر بھی افسوس کا اظہار کرتے ہوئے ریمارکس دئیے کہ ہم نماز پڑھنے جاتے ہیں مگر پانی ضائع کرتے ہیں ،مسجدوں میں نلکوں کی بجائے واٹر ٹینک ہونے چاہئیں ، جہاں سے ڈبے کے ذریعے پانی نکال کر وضو کیاجائے ۔عدالت نے لاہور کرکٹ میچز کے دوران ٹریفک انتظامات پر تشویش کا اظہار کیا، عدالت نے ریمارکس دئیے کہ پہلے سے پتہ تھا کہ یہاں چیمپئنز ٹرافی ہونی ہے مگر یہاں دفتروں سے کوئی نہیں نکلتا ،ٹریفک کا نظام درہم برہم ہے ،عوام پریشان ہیں ۔ عدالت نے آئندہ سماعت پر سی ٹی او لاہور کو ذاتی حیثیت میں طلب کر لیا اور حکم دیا کہ ٹیموں کی آمد و رفت کے اوقات سے عوام کو آگاہ کیا جائے اور سڑکوں پر متبادل روٹس کے نشانات واضح طور پر لگائے جائیں۔ عدالت نے پی ڈی ایم اے کی کارکردگی پر بھی تشویش کا اظہار کیا اور ریمارکس دئیے کہ یہ اداراہ سویا ہے انہیں جاگنے کی ضرورت ہے ،عدالت نے ہدایت کی کہ محکمہ ماحولیات کی منظوری کے بغیر کوئی پراجیکٹ شروع نہیں ہونا چاہئے ۔عدالت نے آئندہ سماعت پر واٹر میٹر کے حوالے سے رپورٹ طلب کرتے ہوئے سماعت 10 فروری تک ملتوی کردی۔۔
