رمضان کے دوران مہنگائی میں مسلسل اضافہ، چینی کی قیمت 9 روپے کلو بڑھ گئی
اسلام آباد(مانیٹرنگ ڈیسک) رمضان المبارک کے دوران مہنگائی میں مسلسل اضافہ ، کئی اشیا مزید مہنگی ہو گئیں۔
وفاقی ادارہ شماریات نے ہفتہ وار بنیادوں پر مہنگائی کے اعداد و شمار جاری کردیے ، جس کے مطابق رمضان المبارک کے دوسرے ہفتے میں مہنگائی کی شرح میں اضافہ ریکارڈ ہوا ہے اور ایک ہفتے کے دوران مہنگائی کی شرح 0.22 فیصد مزید بڑھ گئی ہے ۔ رپورٹ کے مطابق مسلسل پندرہویں ہفتے چینی کی قیمت میں اضافہ ریکارڈ کیا گیا ، جس کے مطابق ایک ہفتے میں چینی 9 روپے 26 پیسے فی کلو تک مزید مہنگی ہو گئی۔ اسی طرح ایک ہفتے میں 12 اشیائے ضروریہ کی قیمتوں میں اضافہ ہوا ہے ۔ اعداد و شمار کے مطابق ایک ہفتے میں ٹماٹر 21 روپے 37 پیسے فی کلو مہنگا ہوا، برائلر مرغی 30 روپے 64 پیسے فی کلو مہنگی ہو گئی جب کہ گزشتہ ہفتے میں کیلے 12 روپے 18 پیسے فی درجن اور بیف 6 روپے کلو مہنگا ہوا۔ علاوہ ازیں ایک ہفتے میں ایل پی جی گھریلو سلنڈر 46 روپے 19 پیسے مہنگا ہوا۔ رپورٹ میں مزید بتایا گیا ہے کہ ایک ہفتے میں 15 اشیا سستی اور 24 اشیا کی قیمتیں مستحکم رہیں ۔ پیاز کی فی کلو قیمت میں 13 روپے 97کمی ہوئی۔ گزشتہ ہفتے آلو 5روپے 16 پیسے فی کلو، لہسن 35 روپے فی 63 پیسے فی کلو سستا ہوا۔ اسی طرح ایک ہفتے میں دال چنا 6 روپے تک، دال ماش 2 روپے 28 پیسے فی کلو سستی ہوئی۔ ان کے علاوہ انڈے ،دال مسور، چاول، خوردنی تیل اور گھی سستی ہونے والی اشیا میں شامل ہیں۔
