جہاں پی ٹی آئی کا فسادی ٹولہ وہاں قومی اتحاد مشکل:عظمیٰ
لاہور(مانیٹرنگ ڈیسک)وزیر اطلاعات پنجاب عظمیٰ بخاری نے کہا ہے کہ جہاں پی ٹی آئی کا فسادی ٹولہ ہو ، وہاں قومی اتحاد مشکل ہے ۔
پنجاب اسمبلی کے باہر میڈیا سے گفتگو کرتے ہوئے عظمیٰ بخاری نے کہا کہ دہشت گردی کا مقابلہ کرنے کیلئے ہمیں متحد ہونا ہوگا، مگر جہاں پر تحریک انصاف کا فسادی ٹولہ بیٹھا ہو، جو مذمت تک نہ کرے اور اپنی فوج پر چڑھ دوڑے ، وہاں متحد ہونا بھی مشکل ہے ۔قومی اسمبلی کے اجلاس میں پی ٹی آئی کی طرف سے ایک مذمت تک کا لفظ نہیں بولا گیا، اسمبلی میں موجود پی ٹی آئی کے لوگوں کو کالعدم تنظیم بلوچستان لبریشن آرمی کے خلاف بولنا چاہئے تھا۔ایک شخص کو بچانے کی جنگ کے بجائے ہمیں ملک بچانے کی بات کرنی چاہئے ، ملک سب کا ہے ، تحریک انصاف کو اپنے قیدی کے بجائے خیبرپختونخوا کے عوام کا خیال رکھنا ہوگا، امن و امان برقرار رکھنا صوبائی حکومتوں کی ذمہ داری ہے ، اور وہ اس سے نہیں بھاگ سکتے ۔ انہوں نے کہا کہ ہمیں ایک نیا نیشنل ایکشن پلان بنانا ہوگا، وزیراعظم نے اس معاملے کو بخوبی ٹیک اپ کیا ہے ۔ مجرموں کو حکومت کے ساتھ نہیں بٹھا سکتے ، البتہ پی ٹی آئی کے باقی لوگ حکومت کے ساتھ بات کر سکتے ہیں۔
