جنوبی افریقی سیکرٹری دفاع کا ایئر ہیڈکوارٹرز کا دورہ ،ایئر چیف سے ملاقات
اسلام آباد (مانیٹرنگ ڈیسک ،نیوز ایجنسیاں )جنوبی افریقہ کے قائم مقام سیکرٹری دفاع ڈاکٹر تھوبی کیلے گامیدے کی سربراہی میں وفد نے ایئر ہیڈکوارٹرز کا دورہ کیا۔
جنوبی افریقہ کے دفاعی وفد نے پاک فضائیہ کے سربراہ ایئر چیف مارشل ظہیر احمد بابر سدھو سے ملاقات کی۔ آئی ایس پی آر کے مطابق اس موقع پر ایئرچیف مارشل ظہیر احمد بابر سدھو نے جنوبی افریقہ کی فضائیہ کیساتھ فوجی تعاون اور تربیتی شعبے میں اشتراک کے عزم کا اعادہ کیا۔ آئی ایس پی آر کے مطابق ڈاکٹر تھوبی کیلے گامیدے نے پاک فضائیہ کی پیشہ ورانہ مہارت اور کامیابیوں کو سراہا، انھوں نے پاک فضائیہ کی جدید ٹیکنالوجی میں پیشرفت کی تعریف کی۔ آئی ایس پی آر کے مطابق جنوبی افریقی دفاعی وفد نے پاک فضائیہ سے اہم ساز و سامان کی سروسنگ کیلئے تعاون کی خواہش کا اظہار کیا۔ یہ دورہ دونوں ممالک کے درمیان فوجی شراکت داری کو فروغ دینے کے عزم کا اظہار ہے ۔
