جولائی تا مارچ : بیرونی قرض کیلئے 19 ارب 39 کروڑ ڈالر تخمینہ، محض ساڑھے 5 ارب ڈالر ملے
اسلام آباد (کامرس رپورٹر)رواں مالی سال 9 ماہ کے دوران (جولائی تا مارچ) 19 ارب 39 کروڑ ڈالر تخمینہ میں سے محض 5 ارب 50 کروڑ ڈالر ملے۔
دستاویز کے مطابق گزشتہ مالی سال اس عرصہ کے دوران 17 ارب 61 کروڑ ڈالر تخمینہ میں سے محض 6 ارب 90 کروڑ ڈالر ملے تھے ۔ گزشتہ ماہ مارچ کے دوران 55 کروڑ 52 لاکھ ڈالر کی ایکسٹرنل فنانسنگ حاصل کی گئی۔ اقتصادی امور رپورٹ کے مطابق جولائی تامارچ مالیاتی اداروں سے 2 ارب 82 کروڑ 76 لاکھ ڈالر موصول ہوئے ، اس دوران باہمی معاہدوں کے تحت 35 کروڑ 84 لاکھ ڈالر قرض حاصل کیا گیا، کمرشل بینکوں سے 56 کروڑ ڈالر، نیا پاکستان سرٹیفکیٹس سے 1 ارب 45 کروڑ ڈالر فنانسنگ حاصل کی گئی۔ فرانس 10 کروڑ 80 لاکھ ڈالر، چین سے 9 کروڑ 91 لاکھ ڈالر، امریکا سے 4 کروڑ ڈالر کی فنانسنگ ہوئی ،سعودی عرب 1 کروڑ 35 لاکھ ڈالر، جاپان سے 2 کروڑ 88 لاکھ ڈالر مل سکے ۔ جولائی سے مارچ (روپوں میں ) 1 ہزار 533 ارب 44 کروڑ روپے کا قرض حاصل کیا گیا، اقتصادی امور ڈویژن کی جولائی سے مارچ کے دوران غیر ملکی امداد اور وصول قرضوں کی رپورٹ میں بتایا گیا کہ ایشیائی ترقیاتی بینک 1 ارب 19 کروڑ ڈالر، انٹرنیشنل ڈویلپمنٹ ایسوسی ایشن سے 72 کروڑ ڈالر موصول ہوئے۔
