کشیدگی کم کرنیکی کوشش، ایرانی وزیرخارجہ پاکستان پہنچ گئے
تہران، اسلام آباد (مانیٹرنگ ڈیسک، نیوز ایجنسیاں) ایران نے پاک بھارت کشیدگی میں کمی کیلئے سفارتی کوششیں تیز کر دیں، ایرانی وزیرِ خارجہ عباس عراقچی اسلام آباد پہنچ گے، وہ پاکستانی قیادت سے ملاقاتیں کریں گے۔
ترجمان ایرانی وزارت خارجہ اسماعیل بقائی کے مطابق ایران خطے میں کشیدگی میں کمی لانے کیلئے کام کر رہا ہے ،وزیر خارجہ عباس عراقچی صدرِ پاکستان آصف علی زرداری، وزیرِ اعظم شہباز شریف اورنائب وزیرِ اعظم اسحاق ڈار سے پہلگام فالس فلیگ آپریشن کے بعد کی صورت حال پر تبادلہ خیال کریں گے ، وہ پاکستانی حکام کی تجاویز لیں گے ، جس کے بعد بھارت کے دورے پر نئی دہلی جائیں گے ، دونوں ملکوں کے دورے کا مقصد پہلگام واقعہ کے بعد ہونے والی کشیدگی میں کمی لانا ہے ۔ایرانی وزیرِ خارجہ نے پاکستان اور بھارت کے درمیان کشیدگی میں کمی کیلئے ثالثی کی پیشکش کی تھی جبکہ ایرانی صدر مسعود پزشکیان نے وزیرِ اعظم شہباز شریف اور بھارتی وزیرِ اعظم نریندر مودی سے بھی ٹیلی فون پر گفتگو کی تھی۔دفترِ خارجہ کے ترجمان کا کہنا ہے کہ ایرانی وزیرِ خارجہ کا یہ دورہ پاکستان اور ایران کے برادرانہ تعلقات کا عکاس ہے ، دونوں ممالک کے درمیان مختلف شعبوں میں تعاون بڑھانے پر بھی بات ہو گی۔ پاکستان اور ایران کے تعلقات مشترکہ تاریخ، ثقافت اور مذہب پر مبنی ہیں،ایرانی وزیرِ خارجہ کا دورہ پاک ایران تعلقات کو مزید مضبوط بنانے میں معاون ہو گا۔
