ڈار کا افغان وزیر خارجہ کو فون بھارتی اشتعال انگیزی سے آگاہ کیا
اسلام آباد(اے پی پی)نائب وزیراعظم و وزیر خارجہ سینیٹر محمد اسحاق ڈار نے افغانستان کے قائم مقام وزیر خارجہ امیر خان متقی سے ٹیلی فون پر بات چیت کی۔
منگل کو دفتر خارجہ کے مطابق دونوں رہنماؤں نے 19 اپریل کو نائب وزیر اعظم کے دورہ افغانستان کے بعد سے دو طرفہ تعلقات میں ہونے والی پیش رفت پر اطمینان کا اظہار کیا ۔ فریقین نے خطے اور اس سے باہر امن و سلامتی کو فروغ دینے کیلئے طویل المدتی تعاون کو فروغ دینے کیلئے اعلیٰ سطح کے رابطوں کو برقرار رکھنے کی اہمیت پر بھی اتفاق کیا۔ نائب وزیراعظم نے قائم مقام افغان وزیر خارجہ کو بھارت کی طرف سے پاکستان کے خلاف حالیہ اشتعال انگیزی اور غیر قانونی اور یکطرفہ اقدامات سے آگاہ کیا۔ انہوں نے امن کیلئے پاکستان کے عزم اور پاکستان کی خودمختاری کے تحفظ کا اعادہ کیا۔ امیر خان متقی نے تجارت میں آسانی اور سفری سہولتوں کیلئے پاکستان کے فعال اقدامات کو سراہا اور نائب وزیر اعظم کو دوبارہ افغانستان کے دورے کی دعوت دی۔ انہوں نے پاکستان کی حکومت اور عوام کیلئے دعاؤں اور نیک خواہشات کا اظہار کیا۔ سینیٹر اسحاق ڈار نے الجزائر کے وزیر خارجہ احمد عاطف سے بھی منگل کو ٹیلی فونک گفتگو کی۔ نائب وزیراعظم نے انہیں بدلتی ہوئی علاقائی صورتحال اور بھارت کی اشتعال انگیز بیان بازی اور پاکستان کے خلاف یکطرفہ اقدامات سے پیدا ہونے والی کشیدگی سے آگاہ کیا ۔ الجزائر کے وزیر خارجہ نے تحمل کی اہمیت اور دونوں طرف سے کشیدگی کم کرنے کی ضرورت پر زور دیا۔
