افغانستان سے دراندازی ناکام،فتنہ خوارج کے 30دہشتگرد ہلاک
راولپنڈی(خصوصی نیوز رپورٹر)سکیورٹی فورسز نے پاک افغان سرحد پر شمالی وزیرستان کے علاقے حسن خیل میں دراندازی کی کوشش ناکام بناتے ہوئے بھارتی پراکسی فتنہ خوارج کے 30 دہشتگردوں کو ہلاک کردیا۔
جمعہ کو آئی ایس پی آر سے جاری کردہ بیان کے مطابق یکم دو اور دو تین جولائی کی درمیانی شب،سکیورٹی فورسز نے ہندوستانی پراکسی فتنہ الخوارج سے تعلق رکھنے والے دہشتگردوں کے ایک بڑے گروہ کی شمالی وزیرستان کے ضلع حسن خیل میں نقل و حرکت کی نشاندہی کی جو پاکستان افغان سرحد کے ذریعے دراندازی کی کوشش کر رہے تھے ۔ سکیورٹی فورسز نے موثر طریقے سے ہندوستانی حمایت یافتہ خوارج کی دراندازی کی کوشش کو ناکام بنایا۔مہارت اور نشانے پر کارروائی کے نتیجے میں تمام 30 ہندوستانی خوارج کو ہلاک کردیا گیا۔ہلاک ہونے والے بھارتی حمایت یافتہ خوارج سے بھاری مقدار میں اسلحہ، گولہ بارود اور دھماکا خیز مواد بھی برآمد ہوا ہے ۔ سکیورٹی فورسز نے غیر معمولی پیشہ ورانہ مہارت، چوکسی اور تیاری کا مظاہرہ کیا اور کسی ممکنہ تباہی کو روکا۔ آئی ایس پی آر نے مزید کہا عبوری افغان حکومت کو پاکستان کے خلاف دہشت گردی کی کارروائیوں کے لئے غیر ملکی پراکسیز کے ذریعے ہونے والے افغان سرزمین کے استعمال کو روکنے کی ضرورت ہے ۔
پاکستان کی سکیورٹی فورسز ملک کی سرحدوں کے دفاع اور ملک سے ہندوستانی سپانسرڈ دہشت گردی کی لعنت کو ختم کرنے کیلئے اپنے غیر متزلزل عزم کا اعادہ کرتی ہیں۔صدر اور وزیراعظم نے بھارتی حمایت یافتہ خوارج کے ناپاک اور دہشت گردانہ عزائم ناکام بنانے پر پاک فوج کی کارروائیوں کو سراہتے ہوئے کہا بہادر افواج ملک کی حفاظت کیلئے سیسہ پلائی دیوار ہیں ۔ صدر آصف علی زرداری نے کہا دہشت گردوں کے مکمل خاتمے تک سکیورٹی فورسز کی کارروائیاں جاری رہیں گی، پاکستان کی سکیورٹی فورسز کا بھارتی حمایت یافتہ دہشت گردوں کے خاتمے کے لیے کامیاب کارروائیاں کرنا خوش آئند ہے ، دہشت گرد عناصر کے خاتمے اور ملکی دفاع کیلئے ہمارا عزم غیر متزلزل رہے گا۔ وزیراعظم شہباز شریف نے کہا پاکستان کی بہادر افواج ملک کی حفاظت کے لئے سیسہ پلائی ہوئی دیوار کی طرح کھڑی ہیں اور پوری قوم سکیورٹی فورسز کو سلام پیش کرتی ہے ۔ ملک سے ہر قسم کی دہشت گردی کے مکمل خاتمے کے لئے پر عزم ہیں۔وفاقی وزیر داخلہ محسن نقوی نے کہاہندوستان کے حمایت یافتہ دہشت گردوں کا انجام عبرتناک موت ہے ، دہشت گردوں اور ان کی پشت پناہی کرنے والوں کو نہیں چھوڑیں گے ۔
