صدر کے استعفے یا آرمی چیف کے صدارتی منصب سنبھالنے سے متعلق کوئی گفتگو،سوچ یا منصوبہ نہیں:وزیر داخلہ
اسلام آباد ( نیوز ایجنسیاں، مانیٹرنگ ڈیسک )وفاقی وزیر داخلہ محسن نقوی نے کہا ہے کہ ہم صدر آصف علی زرداری ، وزیراعظم شہبازشریف اور آرمی چیف کے خلاف بدنیتی پر مبنی مہم کے پیچھے کارفرما عناصر سے بخوبی آگاہ ہیں۔
واضح طور پر کہہ چکے ہیں کہ صدر مملکت کے استعفیٰ یا آرمی چیف کی جانب سے صدارت کے منصب کی خواہش سے متعلق کوئی گفتگو ، سوچ یا منصوبہ موجود نہیں،اس بیا نیہ میں ملوث عناصر کے لئے واضح پیغام ہے کہ آپ ملک دشمن بیرونی ایجنسیوں کے ساتھ ملکر جو چاہئے کر لیں ہم پاکستان کو مضبوط بنانے کے لئے ہر وہ قدم اٹھائیں گے جو ضروری ہو گا ۔محسن نقوی نے ایکس پر اپنی پوسٹ میں خبر دار کیا کہ گمراہ کن سوچ کون اور کس مقصد کے لئے پھیلا رہا ہے اور اس پروپیگنڈے سے کس کو فائدہ ہو سکتا ہے ،مکمل باخبر ہیں ۔انہوں نے کہاکہ صدر کے مسلح افواج کی قیادت کے ساتھ مضبوط اور قابل احترام تعلقات ہیں ۔ وزیر داخلہ نے کہا کہ بری فوج کے سربراہ کی توجہ کا مرکز پاکستان کو مستحکم اور مضبوط بنانا ہے اور اس کے علاوہ کوئی مقصد نہیں ۔ محسن نقوی نے صدر مملکت کے موقف کو بیان کرتے ہوئے کہا کہ صدر جانتے ہیں کہ یہ جھوٹ کون پھیلا رہا ہے ۔وزیرداخلہ نے کہا کہ جھوٹ، پروپیگنڈے اور بدنیتی پر مبنی مہمات کے باوجود ریاستی ادارے پرعزم ہیں کہ پاکستان کے استحکام اور سالمیت کو ہر صورت یقینی بنایا جائے گا۔
