فرنٹیئر کانسٹیبلری کو وفاقی فورس بنانیکا فیصلہ : چاروں صوبوں، آزاد کشمیر، گلگت بلتستان میں کارروائی کا اختیار ہوگا، داخلی سلامتی اور امن و امان کے قیام میں مدد ملے گی
اسلام آباد (دنیا نیوز) وفاقی حکومت نے فرنٹیئر کانسٹیبلری کو ملک گیر فیڈرل فورس میں تبدیل کرنے کا فیصلہ کیا ہے، چاروں صوبوں، آزاد کشمیر اور گلگت بلتستان میں کارروائی کا اختیار ہوگا، داخلی سلامتی اور امن و امان کے قیام میں مدد ملے گی، ملک بھر میں بھرتی اور دفاتر قائم ہونگے، فورس کے قیام کیلئے آرڈیننس جاری کیا جائے گا۔
ذرائع کا کہنا ہے کہ وفاقی حکومت نے فرنٹیئر کانسٹیبلری (ایف سی) کو ملک گیر وفاقی فورس میں توسیع دینے کا فیصلہ کیا ہے ۔ اس فیصلے پر عمل درآمد کیلئے وفاقی کابینہ کی طرف سے فرنٹیئر کانسٹیبلری ایکٹ 1915 میں ترامیم کی منظوری کے بعد پورے پاکستان میں ایف سی کا دائرہ اختیار بڑھانے کیلئے آرڈیننس جاری کیا جائے گا۔ ذرائع کے مطابق فورس کا نام بدل کر فیڈرل کانسٹیبلری رکھا جائے گا جس کو چاروں صوبوں، اسلام آباد، آزاد جموں و کشمیر اور گلگت بلتستان میں کام کرنے کا اختیار دیا جائے گا۔ آرڈیننس کے نفاذ کے بعد نئی فورس کیلئے ملک بھر میں بھرتی اور دفاتر قائم کیے جائیں گے۔ تنظیم نو فریم ورک کے تحت فیڈرل کانسٹیبلری کی کمانڈ پولیس سروس کے افسران کریں گے۔ فیڈرل کانسٹیبلری کے قیام سے ملکی داخلی سلامتی اور امن عامہ کے قیام میں خاطر خواہ مدد ملے گی۔ دفاعی ماہرین کے مطابق اس اقدام کو قومی سطح پر داخلی سلامتی کا طریقہ کار مضبوط اور مرکزی بنانے کی وسیع تر کوششوں کا حصہ قرار دیا جا رہا ہے۔
