کمیٹی پر کام شروع نہ ہوا تو لانگ مارچ کرینگے :حافظ نعیم
لاہور (دنیا نیوز،مانیٹرنگ ڈیسک)امیر جماعت اسلامی پاکستان حافظ نعیم الرحمان نے کہا ہے کہ سازشیں کرنیوالا حکمران طبقہ ہے ، سرمایہ داروں کے ساتھ مل کر لوٹ مار کا سلسلہ جاری ہے ، طاقتور لوگ جب وسائل پر قبضہ کریں گے تو غم و غصہ تو پیدا ہوگا، بلوچستان کے مسائل حل کرنا چاہتے ہیں۔
اگر کمیٹی پر آج سے کام شروع نہیں ہوا تو پھر میں لانگ مارچ کا آغاز کروں گا، پھر ہم دیکھیں گے کون ہمارا راستہ روکتا ہے ، سیدھے طریقے سے آج ہی مذاکرات شروع کریں۔ان خیالات کا اظہار انہوں نے گزشتہ روز لاہور پریس کلب کے باہر جماعت اسلامی کے دھرنے کے دوسرے روز شرکا سے خطاب کرتے ہوئے کیا۔ حافظ نعیم نے مزید کہا کہ حقوق بلوچستا ن لانگ مارچ کے شرکا مختلف شہروں سے ہوتے ہوئے لاہور پہنچے ، پورا پاکستان بلوچستان کے ساتھ ہے ، جماعت اسلامی سب کے حقوق کیلئے بات کرتی ہے ، ہمیں معلوم ہے پنجاب اور بلوچستان کی حکومت فارم 47 والی ہے ۔ پولیس کو راستے سے ہٹانا ہمارے لئے کوئی مسئلہ نہیں تھا لیکن ہم لڑنا نہیں چاہتے ، بلوچ، پشتونوں کوعزت دو، بلوچ نوجوانوں کے زخموں پر مرہم رکھنا ہوگا۔انہوں نے کہا کہ بلوچستان کے لاپتا نوجوانوں کے حکومت شواہد پیش کرے ، لاپتا کرنا کسی صورت قابل قبول نہیں ، کمیشن میں لاپتا نوجوانوں کو پیش کیا جائے ، اگر کوئی مجرم یا ملک دشمن ہے تو عدالتوں میں پیش کرو۔امیر جماعت اسلامی نے کہا کہ غداری کے سرٹیفکیٹ بانٹنا چھوڑ دو اس طرح ریاستیں نہیں چلتیں ، بلوچستان کے نوجوانوں کو حقوق دیئے جائیں۔نعیم الرحما ن نے کہا کہ پاک، ایران گیس پائپ لائن منصوبے پر عملدرآمد کیا جائے ، ہمسایہ ممالک کے ساتھ بارڈر کے معاملات مذاکرات سے طے کئے جائیں ، اگر لوگوں کو طاقت سے ہینڈل کرو گے تو پھر بغاوتیں پھوٹتی رہیں گی، لاہور میں بلوچوں کا مقدمہ پیش ہو رہا ہے ، پورے پاکستان کو اس مافیا سے نجات دلائیں گے ، اب عوام اکٹھے اور یہ مافیا تقسیم ہوگا۔
