گنڈا پور صوبے میں امن قائم نہیں کرسکتے تو استعفی دیدیں:عمران خان:جیل میں سہولیات بحال
راولپنڈی (خبرنگار ،مانیٹرنگ ڈیسک )بانی پی ٹی آئی عمران کی اڈیالہ جیل میں سہولتیں بحال کردی گئیں جبکہ ان کی بیٹوں سے فون پر بات بھی کروائی گئی ہے ،ان کا کہناتھاکہ کبھی نہیں کہا کہ بچے احتجاج کیلئے پاکستان آئیں۔
علیمہ خان کو سیاسی بات نہیں کرنی چاہئے ، علی امین گنڈا پور صوبے میں امن قائم نہیں کر سکتے تو استعفیٰ دے دیں۔ عمران کا اڈیالہ جیل راولپنڈی میں توشہ خانہ ٹو کیس کی سماعت پر پیشی کے موقع پر کہناتھاکہ بچے صرف مجھ سے ملنے پاکستان آئیں گے ، میرے بچے سیاست یا احتجاجی تحریک کا حصہ نہیں بنیں گے ،گزشتہ روز بچوں سے فون پر بات کر کے معلوم ہوا کہ بچوں کا نائیکوپ ایکسپائر ہو گیا ہے ۔انہوں نے کہا کہ علیمہ خان کو سیاسی بات نہیں کرنی چاہئے ، بانی پی ٹی آئی نے مشال یوسفزئی کے سینیٹر بننے پر علیمہ خان کے بیان کو غیر ضروری قرار دیا۔ذرائع کے مطابق بانی پی ٹی آئی نے کہا کہ علی امین گنڈاپور اگر صوبے میں امن و امان قائم نہیں کر سکتے تو انہیں استعفیٰ دے دینا چاہئے ، علی امین گنڈاپور اگر گورننس کے مسائل حل نہیں کر سکتے تو کسی اور کو موقع دینا چا ہئے ۔ ذرائع کے مطابق اڈیالہ جیل انتظامیہ نے بانی پی ٹی آئی عمران خان کی اپنے بیٹوں سے فون پر بات کروا دی ، ایک گھنٹے سے زائد بچوں سے بات ہوئی جبکہ انہیں اخبارات اورکتابیں بھی فراہم کی جارہی ہیں اور ٹی وی کی سہولت بھی موجود ہے ۔اڈیالہ جیل راولپنڈی میں توشہ خانہ ٹو کیس کی سماعت کے دوران بانی پی ٹی آئی عمران خان نے اپنے بچوں سے رابطے کی تصدیق کر دی۔
