پسند کی شادی پر جھنگ میں لیڈی ڈاکٹر، راجن پور میں جوڑا قتل
جھنگ/راجن پور(این این آئی)پسند کی شادی کرنے پرجھنگ میں کرغزستان سے ڈاکٹر بن کر آنے والی بہن کوبھائی نے جبکہ راجن پور میں بھی پسند کی شادی کرنیوالے جوڑے کو نامعلوم ملزموں نے قتل کردیا۔
موضع گگڑانہ حویلی لعل میں 20 سالہ عمیر مشتاق گگڑانہ نے بہن عائشہ کو فائرنگ کرکے موت کے گھاٹ اتارا۔ جھنگ پولیس کے مطابق ڈاکٹر عائشہ چند روز قبل ہی کرغزستان سے ایم بی بی ایس کرکے واپس آئی تھی، اس نے ویڈیو لنک کے ذریعے ڈاکٹر حسنین سے نکاح کیا تھا۔پولیس کے مطابق مقتولہ کے اہلخانہ نکاح سے خوش نہیں تھے ، ڈاکٹر عائشہ کو اس کے بھائی نے قتل کیا ہے اور فرارہوگیا۔ ملزم کی گرفتاری کے لیے چھاپے مارے جارہے ہیں۔دریں اثنا راجن پور کے علاقے محمدپور میں پسند کی شادی کرنے والے میاں، بیوی کو غیرت کے نام پر قتل کردیاگیا۔پولیس کے مطابق جوڑے نے 6 ماہ قبل پسند کی شادی کی تھی، خاتون کے گھر والوں نے فائرنگ کرکے دونوں کو قتل کردیا، ملزم جائے واردات سے فرار ہوگئے ، پولیس نے مقتولین کی لاشیں پوسٹ مارٹم کے لیے ہسپتال منتقل کرکے واقعے کی تحقیقات شروع کردیں ۔
