اورنج ٹرین کے سٹیشنز، سٹاپس سولر پاور پر منتقل کرنیکا فیصلہ
لاہور(سٹاف رپورٹر سے)پنجاب حکومت نے بجلی اور اخراجات میں کمی کیلئے اہم فیصلہ کرلیا، اورنج لائن ٹرین کے تمام سٹیشنز، سٹاپس اور برقی زینے شمسی توانائی پر منتقل کرنے کیلئے 1.6 میگاواٹ تک کا سولر پاور پلانٹ لگایا جائے گا۔۔۔
پلانٹ سے ماہانہ کروڑوں روپے بجلی سبسڈی کی مد میں بچائے جاسکیں گے ۔پنجاب حکومت نے اورنج لائن ٹرین کے اخراجات میں کمی اور سرکاری خزانے کی بچت کیلئے بڑا فیصلہ کرلیا ہے ۔رپورٹ کے مطابق اورنج لائن ٹرین کیلئے 1.6میگا واٹ کا سولر پاور پلانٹ لگایا جائے گا، جس کے ذریعے اورنج لائن ٹرین کے تمام سٹیشنز کو بجلی فراہم ہوگی۔رپورٹ کے مطابق سولر پاور پلانٹ سے حاصل ہونیوالی بجلی سے اورنج لائن ٹرین کے برقی زینے ، سٹاپس اور دیگر ضروریات کو پورا کیا جائے گا۔وزیر ٹرانسپورٹ پنجاب کا کہنا ہے کہ پنجاب حکومت سالانہ اربوں روپے بطور سبسڈی فراہم کرتی ہے ، اورنج لائن ٹرین کے سٹیشنز اور الائیڈ انفرا سٹرکچر کو شمسی توانائی پر منتقل کیا جائیگا، جس سے بجلی بلوں کی مد میں ماہانہ کروڑوں روپے کی بچت ہوسکے گی۔
