نیول چیف ایڈمرل نوید اشرف کیلئے ترکیہ کا اعلیٰ عسکری اعزاز
راولپنڈی (خصوصی نیوز رپورٹر)پاک بحریہ کے سربراہ ایڈمرل نوید اشرف کو ترکیہ میں اعلیٰ عسکری اعزاز لیجن آف میرٹ آف دی ترک آرمڈ فورسز دیا گیا۔ترک نیول فورسز کے ہیڈکوآرٹرز آمد پر سربراہ پاک بحریہ کو گارڈ آف آنر پیش کیا گیا۔
چیف آف دی نیول سٹاف ایڈمرل نوید اشرف نے ترک نیول فورسز کے کمانڈر سے اہم ملاقات کی۔ملاقات میں دونوں ممالک کے درمیان بحری تعاون اور باہمی دلچسپی کے امور پر تبادلہ خیال کیا گیا۔آئی ایس پی آرکے مطابق ترکیہ کے سرکاری دورے کے دوران نیول چیف نے ترک وزیر دفاع، چیف آف جنرل سٹاف اور کمانڈر ترکش نیوی فلیٹ سے ملاقاتیں کیں۔ملاقاتوں میں علاقائی میری ٹائم سکیورٹی، دفاعی شراکت داری، مشترکہ مشقوں اور تربیتی صلاحیتوں کے فروغ پر زور دیا گیا۔پاک بحریہ کے ملجم پراجیکٹ کا جائزہ لینے کیلئے سربراہ پاک بحریہ نے استنبول نیول شپ یارڈ کا دورہ کیا ۔گولچک نیول بیس کے دورے کے موقع پر ایڈمرل نوید اشرف نے آبدوزوں کی تعمیراتی صلاحیتوں کا بھی مشاہدہ کیا۔نیول چیف نے ترکش جہاز اور ترک بحریہ کی متعدد نیول تنصیبات کا دورہ کیا اور مصطفی کمال اتاترک کے مزار پر پھول رکھے ۔
