ضمنی انتخاب ،پی ٹی آئی کو امیدوار نہیں مل رہا:عظمیٰ بخاری
لاہور (مانیٹرنگ ڈیسک)وزیر اطلاعات و ثقافت پنجاب عظمیٰ بخاری نے کہا ہے کہ پی ٹی آئی ضمنی انتخاب سے راہِ فرار اختیار کر چکی ہے اور اسے امیدوار ہی نہیں مل رہا۔ مسلم لیگ (ن)کا ٹکٹ اب ہاٹ کیک بن چکا ہے۔
ہر نشست پر 15، 15 امیدوار دلچسپی کا اظہار کر رہے ہیں۔ مسلم لیگ (ن)کے پارلیمانی بورڈ کے اجلاس میں ضمنی انتخابات اور تنظیمی معاملات پر تفصیلی بات چیت ہوئی۔عظمیٰ بخاری نے اپنے بیان میں مزید کہا ہے کہ ضمنی انتخابات میں کون ٹکٹ کا حقدار ہے ، اس کا حتمی فیصلہ قائد میاں نواز شریف کریں گے ، جبکہ پارلیمانی بورڈ صرف موزوں امیدواروں کی سفارش کرے گا۔ انہوں نے بتایا کہ پارٹی نے ضمنی انتخابات لڑنے کے خواہش مند افراد سے تجاویز بھی طلب کی ہیں اور جلد ہی پارلیمانی بورڈ کا اگلا اجلاس طلب کیا جائے گا۔انہوں نے مزید کہا کہ پی ٹی آئی ضمنی انتخابات میں میدان سے بھاگ چکی ہے اور ن لیگ کے مقابلے میں کھڑا ہونے کے لیے اس کے پاس امیدوار تک نہیں۔ ن لیگ پوری تیاری کے ساتھ میدان میں موجود ہے جبکہ مخالفین کی صفوں میں انتشار اور مایوسی پائی جاتی ہے ۔
