نئی تجارتی راہداریاں:قازقستان کا سرمایہ کاری پر اظہار آمادگی
اسلام آباد (نیوز رپورٹر) پاکستان میں قازقستان کے سفیر یرزہان کستافن نے چین کے راستے وسط ایشیائی ممالک تک رسائی اور تجارتی راہداریوں کی تعمیر کیلئے سو فیصد سرمایہ کاری پر آمادگی کا اظہار کیا ہے تاکہ نئے کوریڈورز سے دو طرفہ اور بین الملکی تجارت میں اضافہ ہو سکے ۔
وزیر مواصلات عبدالعلیم خان سے ملاقات میں سفیر کا کہنا تھا اُن کے صدر نومبر کے پہلے ہفتے میں پاکستان کا دو روزہ سرکاری دورہ کریں گے جس دوران دونوں ممالک کے مابین بڑے بریک تھرو کی توقع ہوگی، دورے سے قبل تجارت اور ٹرانسپورٹ کے شعبوں میں جوائنٹ ورکنگ گروپس کی تشکیل ہوگی، اُن کا ملک پاکستان سے دو طرفہ تجارت میں اضافہ میں دلچسپی رکھتا ہے ۔ انہوں نے کاشغر سے ترکمانستان سے قازقستان تک راہداری پر بات چیت کی اور کراچی سے چمن سے قندھار تک تجارتی روٹ بہتر بنانے کی تجویز پیش کی۔ عبدالعلیم خان نے سفیر کو ہر ممکن تعاون کا یقین دلاتے ہوئے کہا پاکستان چین،افغانستان اور ایران کے راستے وسطی ایشیائی ممالک تک تجارتی راہداریوں کیلئے سنجیدہ اقدامات چاہتا ہے ۔ این ایل سی سے ممکنہ ٹریڈ معاہدوں پرپیشرفت اور باہمی حل طلب امور پر بھی گفتگو ہوئی۔
