عظمیٰ کا ہتک عزت عدالت میں پہلا کیس دائر کرنیکا اعلان
اپوزیشن لیڈر نے جھوٹے اور ہتک آمیز الزامات لگائے ، انہیں نہیں چھوڑوں گی
لاہور(اپنے نامہ نگار سے)وزیر اطلاعات پنجاب عظمیٰ بخاری نے ہتک عزت کورٹ میں پہلا کیس دائر کرنے کا باضابطہ اعلان کر دیا۔اپنے بیان میں انہوں نے کہااپوزیشن لیڈر پنجاب اسمبلی معین قریشی کے الزامات پر قانونی کارروائی کا فیصلہ کیا گیا، صوبائی وزیر عظمیٰ بخاری نے کہا کہ میرے خلاف جھوٹے اور ہتک آمیز الزامات لگائے گئے ، میں انہیں نہیں چھوڑوں گی۔اپوزیشن لیڈر معین قریشی نے کہا تھا کہ وزیراعلیٰ خیبرپختونخوا سے سوال کرنے والے عظمیٰ بخاری کے پیڈ ملازم ہیں۔وزیراطلاعات عظمیٰ بخاری نے الزامات کو بے بنیاد، جھوٹا اور کردار کشی قرار دیا اور کہا کہ صحافیوں کو ذاتی ملازم کہنا توہین آمیز ہے ، مجھ پر بے بنیاد الزام عائد کیا گیا۔عظمیٰ بخاری نے کہا کہ یہ بیان سیاسی اختلاف نہیں بلکہ ہتکِ عزت ہے ، یہ ہتک عدالت میں لے کر جارہی ہوں، سچ اور جھوٹ کا فیصلہ اب عدالت کرے گی۔
