سلیکشن کمیٹی میں فکسرز شامل،مداح بورڈ پر برس پڑے
لاہور(سپورٹس ڈیسک)قومی کرکٹ ٹیم کے سابق کپتان سلمان بٹ کو سلیکشن کمیٹی میں شامل کرنے پر مداحوں نے بورڈ کو آڑے ہاتھوں لے لیا۔سماجی رابطے کی سائٹ ٹوئٹر (ایکس) پر ٹویٹ کرتے ہوئے صارفین نے لکھا۔۔
کہ تاریخی سپاٹ فکسنگ میں مجرم قرار پانے والے پلیئر کو سلیکشن کمیٹی میں بطور معاون شامل کرنا شرم کی بات ہے ۔سعد نامی صارف نے سوال اٹھایا کہ سلیکشن کمیٹی کے سربراہ وہاب ریاض کے ہمراہ سلمان بٹ کو بطور انکے معاون شامل کرنے پر کیا حفیظ نے اپنی سوچ تبدیل کرلی ہے ، سابق کرکٹر نے ہمیشہ سے مؤقف اپنایا کہ وہ فکسرز کے ساتھ ٹیم میں نہیں کھیلیں گے تاہم اب کیا وہ یہ کرنے کو تیار ہیں! منافقت، اقتدار/پیسے کا لالچ؟۔ایک صارف نے لکھا کہ بورڈ فکسرز کو کیا دوبارہ سرگرم کرنے کی کوشش کررہا ہے ، جس نے باقاعدہ سزا بھگتی۔حسن نامی صارف نے لکھا کہ کرکٹ کی تاریخ کا سب سے بڑا فکسنگ سکینڈل سلمان بٹ نے ترتیب دیا، وہاب ریاض بکی سے کیش سے بھرا بیگ لیتے ہوئے نظر آئے ، بدنام زمانہ سڈنی ٹیسٹ میچ کے بعد کامران اکمل سے پوچھ گچھ کی گئی۔ کیا اب یہ سب پاکستان کی ٹیم کا انتخاب کریں گے ۔
