پاک آسٹریلیا پہلا ون ڈے آج،بابر،شاہین،نسیم کی واپسی
میلبرن (سپورٹس ڈیسک ) پاکستان اورآسٹریلیا کے درمیان میلبرن میں شیڈول سیریز کاپہلاون ڈے میچ آج صبح ساڑھے آٹھ بجے شروع ہوگا۔۔۔
جس کیلئے قومی ٹیم کااعلان کردیاگیاہے ، پہلے ون ڈے کیلئے بابراعظم، شاہین شاہ آفریدی اور نسیم شاہ کی واپسی ہوئی ہے ۔وکٹ کیپر بیٹر محمد رضوان کپتان جبکہ آغا سلمان نائب ہونگے ۔ عبداللہ شفیق، صائم ایوب، کامران غلام، محمد عرفان خان، نسیم شاہ، حارث رؤف اور محمد حسنین ٹیم کاحصہ ہونگے ۔دریں اثنا قومی ٹیم کے کپتان محمد رضوان نے میلبرن کرکٹ گراؤنڈ میں پریس کانفرنس کرتے ہوئے کہاکہ ماضی میں جو کچھ ہوا اسے بھول کر آگے بڑھنا ہے ، پلیئنگ الیون میں میری بھی مشاورت ہوگی لیکن باقی لوگوں کی ان پٹ ہونا اچھی چیز ہے ، میں مشاورت کے ساتھ چلنے والوں میں سے ہوں، نوجوان کھلاڑیوں کے بھی مشورے لیتا ہوں، ابھی جو نوجوان کھلاڑی آئے ہیں ان کے پاس بھی موقع ہے ۔ بابر اعظم، شاہین اور نسیم کی پاکستان کے لیے بہت پرفارمنس رہی ہیں، آج بابر اور شاہین کا نام اپنی پرفارمنس کی وجہ سے ہی ہے ، کھلاڑیوں پر برا وقت آتا ہے ، وہ بھی اسی چیز سے گزر رہے ہیں، بابر اور شاہین اس چیز کو سمجھتے ہیں اور میں بھی انہیں جتنا ہوسکا، سپورٹ کروں گا۔ فخر اور امام کی بہت پرفارمنس ہیں، فخر گیم چینجر کھلاڑی بھی ہے ۔ پاکستان نے دنیا کی کرکٹ کو فالو نہیں کرنا، ہم نے اپنے وسائل کو دیکھنا ہے ، ہمارے لیے پاکستان سب سے پہلے ہے ، جو پلیئر بہتر ہوگا وہی ٹیم کا حصہ ہوگا، میرے لیے سب کپتان ہیں، اگر انہیں لگتا ہے کہ ان کے پاس کچھ اچھا ہے تو وہ شیئر کرسکتے ہیں ،اس میں کوئی دو رائے نہیں کہ فینز ہم سے مایوس ہیں، پاکستان ٹیم کی پرفارمنس پر فینز تھوڑا ناراض ضرور ہیں مگر ہمیں دنیا بھر میں پاکستانی فینز سپورٹ کرتے ہیں اور اب انہیں مایوس نہیں کرینگے ۔
