پہلے چارروزہ میچ میں شاہینز کے ہاتھوں سری لنکااے کوشکست
راولپنڈی (سپورٹس رپورٹر )پاکستان شاہینز نے سری لنکا اے کو پہلے چار روزہ میچ میں 7 وکٹوں سے شکست دے دی، میچ کے آخری دن کھیل کی خاص بات محمد سلیمان اور علی زریاب کی سنچری پارٹنرشپ تھی،شاہینز کو جیتنے کے لیے 222رنز کا ہدف ملا تھا جو اس نے 3وکٹوں پر حاصل کرلیا۔
شاہینز کی دو وکٹیں صرف 32 رنز پر گرگئی تھیں جب کپتان محمد ہریرہ 9 اور عبدالفصیح 22رنز بناکر آؤٹ ہوگئے اس کے بعد محمد سلیمان اور علی زریاب نے تیسری وکٹ کی شراکت میں 158 رنز کا اضافہ کیا۔محمد سلیمان 86 رنز بناکر ونوجا ساہن کی گیند پر بولڈ ہوگئے ۔ علی زریاب نے پہلی اننگز میں نصف سنچری بنانے کے بعد اس مرتبہ 83 رنز ناٹ آؤٹ کی اننگز کھیلی اورمین آف دی میچ قرارپائے ۔حیدرعلی نے 19رنز بنائے اور وہ آؤٹ نہیں ہوئے ۔اس سے قبل سری لنکا اے اپنے گزشتہ روز کے سکور 364میں اضافہ کیے بغیر آؤٹ ہوگئی۔ دنوشا 62 رنز بناکر خرم شہزاد کی گیند پر آؤٹ ہوئے جنہوں نے اننگز میں70 رنز دیکر5 وکٹیں حاصل کیں۔ انہوں نے میچ میں مجموعی طور پر 9وکٹیں 132رنز کے عوض حاصل کیں۔دونوں ٹیموں کے درمیان دوسرا چار روزہ میچ 18 نومبر سے کھیلا جائے گا۔
