قومی ویمن ٹیم ورلڈ کپ کھیلنے بھارت نہیں جائے گی :نقوی
لاہور(سپورٹس ڈیسک )چیئرمین پی سی بی محسن نقوی نے کہا ہے کہ پاکستان ویمن ٹیم آئی سی سی ویمن ورلڈکپ کھیلنے کے لیے بھارت نہیں جائے گی۔
میڈیا سے گفتگو میں انہوں نے قومی ویمن ٹیم کے بھارت جانے یا نہ جانے کے سوال کا دوٹوک الفاظ میں جواب دیا اور کہا کہ پاکستان ٹیم معاہدے کے مطابق بھارت نہیں جائے گی۔ یہ معاہدہ تو پہلے ہی ہو چکا ہے ، نیوٹرل وینیو کا فیصلہ بھارت کو کرنا ہے ۔ یہ نیوٹرل مقام جہاں بھی ہوگا وہاں ہماری ٹیم جائے گی لیکن بھارت نہیں جائیں گے ، جب معاہدہ ہے تو پھر معاہدہ ہی چلے گا۔ ویمن کرکٹ کے حوالے سے ایک دو پراجیکٹس پر کام کر رہے ہیں، جلد آگاہ کرینگے ، ویمن ٹیم میں چھوٹی چھوٹی تبدیلیاں ہوتی رہیں تو پھر ایک ٹریک پر آئے ، اس طرح دوسری ٹیموں انڈر 19، شاہین اور قومی ٹیم کے نتائج آنا شروع ہو جائیں گے ۔ قومی مینز ٹیم کے حوالے سے آئندہ فیصلے ہوں گے ، عاقب جاوید عبوری ذمہ داری سنبھالنے کی درخواست کی یہ عارضی فیصلہ تھا آئندہ ہفتے اس بارے میں دیکھتے ہیں۔جب ان سے سوال کیا گیا کہ محمد رضوان ناراض دکھائی رہے ہیں وہ کہتے ہیں میرے پاس اختیارات نہیں؟ اس پر انہوں نے کہاکہ میں کوئی کمنٹ نہیں کروں گا۔
