پاکستان سپر لیگ میں پہلی بار کھلاڑیوں کی نیلامی کا فیصلہ
گورننگ کونسل کی ورکنگ کمیٹی کے فیصلوں کی حتمی منظوری چیئرمین پی سی بی محسن نقوی دینگے ، ایک دو روز میں باقاعدہ اعلان ہو گا: ذرائع
لاہور (سپورٹس ڈیسک) پاکستان سپر لیگ (پی ایس ایل) میں پہلی بار کھلاڑیوں کی نیلامی کا فیصلہ کیا گیا ہے ، سی ای او سلمان نصیر کے ساتھ میٹنگ میں بیشتر فرنچائزز نے آکشن پر آمادگی ظاہر کر دی۔ گورننگ کونسل کی ورکنگ کمیٹی میں آکشن ڈرافٹ اور ری ٹینشن کے معاملات پر بحث میں پلیئرز آکشن متعارف کرانے کا فیصلہ کیا گیا ہے ۔ ذرائع کے مطابق پی ایس ایل گورننگ کونسل کی ورکنگ کمیٹی کے رات گئے اجلاس میں پی ایس ایل 11 کے لیے کھلاڑیوں کی ری ٹینشن کے حوالے سے بھی فیصلہ ہو گیا۔ ورکنگ کمیٹی کے فیصلوں کی حتمی منظوری چیئرمین پی سی بی محسن نقوی دیں گے جبکہ ضرورت پڑنے پر گورننگ کونسل کا اجلاس طلب کیا جا سکے گا۔ پی ایس ایل چیمپئن لاہور قلندرز نے پلیئرز آکشن کے حق میں ووٹ دیا،
کوئٹہ گلیڈی ایٹرز، اسلام آباد یونائیٹڈ، کراچی کنگز اور حیدر آباد نے بھی آکشن کے حق میں ووٹ دیا جبکہ پشاور زلمی اور سیالکوٹ نے ڈرافٹ آکشن کے حق میں ووٹ دیا۔ پانچ پرانی فرنچائزز نے چار ری ٹینشن پر اتفاق کیا، ان میں ایک برانڈ ایمبیسڈر ہو گا۔ چار ری ٹینشن ہر کیٹیگری میں ایک ایک ہوں گی، ایک پلیئر کو نچلی کیٹیگری میں لا کر برانڈ ایمبیسڈر بنایا جا سکے گا۔ نئی فرنچائزز باقی پلیئرز پول سے اسی طرح کھلاڑیوں کا انتخاب کر لیں گی۔ دو نئی فرنچائزز نے زیرو ری ٹینشن پر زور دیا، باقی پلیئرز پول کا آکشن ہو گا اور فرنچائزز کھلاڑی آکشن میں اٹھائیں گی۔ پی ایس ایل کے آکشن اور ری ٹینشن کا فارمولا چیئرمین محسن نقوی کو بھجوایا جائے گا اور اگلے ایک دو روز میں اس کا باقاعدہ اعلان ہو گا۔
