سیب کاسرکہ صحت کیلئے بہترین، 11 زبردست طبی فوائد کا حامل
سفید سرکے کااستعمال فوائد کا حامل ثابت ہوتا ہے مگر سیب کا سرکہ اس سے بھی زیادہ فائدہ مند ہے
لاہور(دنیانیوز)سفید سرکے کااستعمال فوائد کا حامل ثابت ہوتا ہے مگر سیب کا سرکہ اس سے بھی زیادہ فائدہ مند ہے ،اس سے 11طبی فوائد مل سکتے ہیں ، ہچکیوں سے نجات دلانے سے لے کر نزلہ زکام کو دور بھگانے تک یہ سرکہ صحت کیلئے بہت مفید مانا جاتا ہے ۔ 1:ہچکیوں کی روک تھام اگر ہچکیاں کسی طرح رک نہ رہی ہوں تو ایک چائے کا چمچ سیب کا سرکہ پی لیں، اس کا کھٹا ذائقہ ہچکیوں کو روک دے گا، درحقیقت یہ سرکہ ان اعصابی خلیوں کو روک دیتا ہے جو ہچکیوں کا باعث بنتے ہیں۔ 2:گلے کی تکلیف سے آرام اگر گلے میں تکلیف ہورہی ہو تو سیب کے سرکے سے اس انفیکشن کی روک تھام میں مدد مل سکتی ہے ، سرکے میں موجود تیزابی خصوصیات کے سامنے بیشتر جراثیم ٹک نہیں پاتے ۔ چوتھائی کپ سیب کے سرکے میں چوتھائی کپ گرم پانی ملائیں اور ہر گھنٹے بعد غرارے کریں۔ 3:کولیسٹرول کوکنٹرول کریں ایک طبی تحقیق میں یہ بات سامنے آئی تھی کہ سرکوں میں پائے جانیوالے ایسٹک ایسڈ کے نتیجے میں چوہوں میں خراب کولیسٹرول کی سطح میں کمی آئی، اسی طرح ایک جاپانی تحقیق کے مطابق روزانہ کچھ مقدار میں سیب کا سرکہ استعمال کرنے سے انسانوں میں بھی کولیسٹرول کی سطح کم ہوتی ہے ۔ 4:بند ناک کو کھولیں اگر نزلہ زکام کا شکار ہوجائیں تو سیب کا سرکہ استعمال کرکے دیکھیں۔ اس کے اندر پوٹاشیم موجود ہوتا ہے جو ناک کو کھولتا ہے جبکہ ایسٹک ایسڈ جراثیموں کی تعداد کو کم کرتا ہے اور ناک کھولنے کا کام کرتا ہے ۔ ایک چائے کا چمچ سیب کا سرکہ ایک گلاس پانی میں ملائیں اور پی لیں۔ 5:اپنا وزن کم کریں سیب کا سرکہ جسمانی وزن میں کمی کیلئے بھی فائدہ مند ہے ۔ اس کی وجہ یہ ہے کہ اس میں موجود ایسٹک ایسڈ خوراک کی خواہش کم کرکے میٹابولزم کو تیز کرتا ہے ۔ طبی ماہرین کے خیال میں یہ سرکہ جسم کے نظام ہضم کو بھی تیز کرتا ہے جس کے نتیجے میں دوران خون میں بہت کم کیلوریز باقی رہتی ہیں۔ 6:بالوں کی خشکی سے نجات پائیں سیب کے سرکے کی تیزابیت سر کی سطح میں تبدیلیاں لاکر خشکی کو دور کرتی ہے ، چوتھائی کپ سیب کے سرکے کو چوتھائی کپ پانی میں ملا کر کسی سپرے بوتل میں ڈال لیں اور پھر اپنے سر پر اس کا چھڑکاؤ کریں۔ اس کے بعد اپنے سر پر تو لپیٹ لیں اور 15 منٹ سے ایک گھنٹے تک انتظارکریں اور پھر بالوں کو دھولیں، بہترین نتائج کیلئے ہفتے میں دو بار اس عمل کو دہرائیں۔ 7:کیل مہاسوں کو صاف کریں سیب کا سرکہ ایک قدرتی ٹانک ہے جو جلد کو صحت مند بناتا ہے ، اس کی جراثیم کش خوبیاں کیل مہاسوں کو کنٹرول میں رکھتی ہیں جبکہ جلد کو نرم اور لچکدار بنانے کا کام بھی کرتی ہیں۔ 8:توانائی بڑھائیں ورزش جسم کو نڈھال کردیتی ہے مگر حیرت انگیز طور پر سیب کے سرکے میں موجود امینو ایسڈز اس کمزوری کو دور کرنے کا کام کرتے ہیں۔ سیب کے سرکے میں پوٹاشیم سمیت دیگر اجزابھی شامل ہیں جو تھکان کی کیفیت کو دور کرنے میں مددگار ثابت ہوسکتے ہیں۔ ایک یا دو چمچ سیب کے سرکے کو ایک گلاس میں پانی میں ملا کر پی لیں۔ 9:بدبو سانس کا خاتمہ اگر برش کرنے اور ماؤتھ واش سے بھی سانس کی بو ختم نہیں ہورہی تو اس گھریلو نسخے کو استعمال کرکے دیکھیں۔ سیب کے سرکے سے غرارے کریں یا ایک چائے کا چمچ پانی میں ملا کر پی لیں تاکہ بو پیدا کرنے والے بیکٹریا کا خاتمہ ہوسکے ۔ 10:دانتوں کو چمکائے صبح سیب کے سرکے سے غرارے کرنے سے دانتوں پر جمے داغوں کو ختم کرنے میں مدد ملتی ہے اور وہ چمکنے لگتے ہیں، یہ سرکہ منہ اور مسوڑوں میں موجود بیکٹریا کو بھی ختم کرتا ہے ، غراروں کے بعد دانتوں کو معمول کے مطابق برش کریں۔ 11:بلڈ شوگر پر کنٹرول پائیں سیب کے سرکے کی کچھ مقدار کو پینا بلڈ شوگر لیوم کو متوازن رکھنے میں مددگار ثابت ہوتا ہے ، ذیابیطس ٹائپ ٹو کے مریضوں پر ہونے والی ایک تحقیق کے مطابق دو چائے کے چمچ سیب کا سرکہ سونے سے قبل پینے سے صبح گلوکوز کی سطح میں کمی ریکارڈ کی گئی۔
