جعلی بھرتیوں، نااہلی اور کرپشن کی وجہ سے قومی ائیر لائن تباہ ہو چکی :علی آصف بگا
سرگودھا (سٹاف رپورٹر) ایم پی اے علی آصف بگا نے کہا ہے کہ پی آئی اے کو کروڑوں کے مول فروخت کیا گیا اور ۔۔۔
ن لیگ و پیپلز پارٹی کی جعلی بھرتیوں، نااہلی اور کرپشن کی وجہ سے قومی ائیر لائن تباہ ہو چکی ہے ۔ انہوں نے کہا کہ آج جس طرح اقربا پروری کا بازار گرم ہے ، اس سے پاکستانی معیشت کو غیر معمولی نقصان پہنچ رہا ہے ۔علی آصف بگا نے توشہ خانہ 2 کیس میں پی ٹی آئی کے رہنما عمران خان اور ان کی اہلیہ بشری بی بی کے حق میں اپیل میں مبینہ دانستہ رکاوٹوں پر بھی شدید تحفظات کا اظہار کیا۔ ان کا کہنا تھا کہ یہ اقدامات کھلا سیاسی انتقام اور انصاف کی راہ میں جان بوجھ کر رکاوٹیں کھڑی کرنے کے مترادف ہیں۔انہوں نے مزید کہا کہ اڈیالہ جیل میں عمران خان اور بشری بی بی کو وکیل تک رسائی سے دانستہ طور پر روکا جا رہا ہے تاکہ وہ توشہ خانہ 2 کیس میں دی گئی سزا کے خلاف اپیل کے وکالت نامے پر دستخط نہ کر سکیں۔ علی آصف بگا نے مطالبہ کیا کہ عمران خان اور بشری بی بی کو اپنے وکیل تک مکمل اور بلا روک وٹ رسائی دی جائے اور اپیل کے آئینی و قانونی حق میں کوئی رکاوٹ نہ ڈالی جائے ۔
