کوئی حلقہ بندیوں اور کوئی موسم کی بات کررہا: ہم الیکشن کی تاریخ ملنے تک چین سے نہیں بیٹھیں گے: بلاول
کراچی (دنیا نیوز)چیئرمین پیپلز پارٹی بلاول بھٹو نے کہا ہے کہ کوئی حلقہ بندیوں اور کوئی موسم کی بات کر رہا ،ہم الیکشن کی تاریخ ملنے تک چین سے نہیں بیٹھیں گے۔
ترقیاتی سکیموں کو روکنے پر الیکشن کمیشن، صوبائی حکومت سے معاملہ اٹھائیں گے ، اگر معاملہ حل نہ ہوا تو عدالت کا راستہ بھی جانتے ہیں، معاشرے میں تقسیم اور نفرت کی سیاست ہے ، پیپلز پارٹی چاہتی ہے الیکشن ہو اور آج ہو، حلقہ بندیاں ہوگئیں اب الیکشن کی تاریخ دینی چاہیے ، الیکشن تاریخ کا اعلان ہونے تک چین سے نہیں بیٹھیں گے ،عوام الیکشن سے بھاگنے والے لیڈروں کو پہچانیں۔چیئرمین پیپلز پارٹی نے نیوز کانفرنس سے خطاب میں کہا کہ ہم نے حکومت میں قانون سازی کی تھی ترقیاتی سکیمیں جاری رہیں گی، چاہتے ہیں وفاق اور صوبوں میں سکیمیں جاری رہیں اورترقیاتی سکیموں کو نہ روکا جائے ، بلدیاتی نمائندے اپنی ذمہ داریاں پوری کریں۔
انہوں نے کہا کہ کبھی کوئی نام نہاد لیڈر ٹی وی پر حلقہ بندیوں کا کہتا ہے ، کوئی موسم کی بات کرنا شروع کر دیتاہے اور کوئی کہتا ہے سکیورٹی کا مسئلہ ہے ، انہوں نے نام لیے بغیر فضل الرحمن اور ایم کیوایم پر تنقید کرتے ہوئے کہا کہ عوام کو ایسے لیڈروں کو پہچاننا چاہیے کہ کون الیکشن سے بھاگ رہے ہیں، پیپلز پارٹی واحد جماعت ہے جو الیکشن کے لیے تیار ہے ۔سابق وزیر خارجہ نے کہا کہ آج پاکستان کے عوام کو روٹی، کپڑا، مکان کی اشد ضرورت ہے ، معاشرے میں تقسیم کا بحران \\\"نا تیرا ،نا میرا ،ہم سب کا پاکستان\\\" کے نعرے سے حل ہو سکتا ہے ۔بلاول نے بلدیاتی نمائندوں کو ہدایت کی کہ عوامی مسائل کا حل ترجیح ہونی چاہئے ، کرپشن برداشت نہیں کروں گا ، تمام بحرانوں اور مسائل کا حل پیپلزپارٹی کے منشور میں ہے ۔
