بینظیر کی برسی تقریب: بلاول بھٹو نے آصف زرداری کو مفاہمت کا بادشاہ قرار دیدیا
گڑھی خدا بخش:(دنیا نیوز) چیئرمین پاکستان پیپلزپارٹی بلاول بھٹو زرداری نے بے نظیر بھٹو کی برسی کی تقریب میں آصف زرداری کو مفاہمت کا بادشاہ قرار دے دیا۔
سندھ کے علاقے گڑھی خدا بخش میں سابق وزیرِاعظم بے نظیر بھٹو شہید کی 18ویں برسی کے موقع پر جلسے سے خطاب کرتے ہوئے ہوئے بلاول بھٹو زرداری کا کہنا تھا کہ محترمہ کی شہادت کواٹھارہ سال گزرچکےہیں، قاتلوں،دہشت گردوں کےلیےسب سےبڑا جواب آپ ہو،چاروں صوبوں سےہرسال بڑی تعداد میں لوگ جمع ہوتے ہیں۔
اُنہوں نے کہا کہ پوری دنیا کوپیغام جاتا ہےکل بھی بی بی زندہ اور آج بھی زندہ ہے، جیالوں کی محبت سےہمیں طاقت ملتی ہے، پورے پاکستان سے کارکن آج کے روز یہاں جمع ہوتے ہیں۔
چیئرمین پاکستان پیپلزپارٹی کا کہنا تھا کہ مئی میں بھارت کو جنگ کے میدان میں شکست ہوئی، یہ جیت پورے پاکستان اورعوام کی جیت ہے، اس جیت کو پوری دنیا میں سراہا گیا، گڑھی خدا بخش کی قربانیوں کی وجہ سے پاکستان ایٹمی قوت بنا۔
بلاول بھٹو زرداری نے کہا کہ آصف زرداری نےچین سےجنگی طیارے منگوائے تھے، ان جنگی طیاروں نے پاکستان کے6 جہاز گرائے، شکست کے بعد نریندرمودی کہیں غائب ہو چکا ہے، بھارتی وزیراعظم فیلڈ مارشل کا نام سُن کر چپ ہو جاتا ہے۔
اُن کا کہنا تھا کہ بھارت کےخلاف جنگ میں کامیابی پوری قوم کی جیت ہے، اس سال کی سب سے بڑی خبر پاکستان کی بھارت کو شکست ہے، بھارت آج تک اس شکست کوہضم نہیں کرسکا۔
چیئرمین پاکستان پیپلزپارٹی نے کہا کہ آصف زرداری نےسی پیک کی بنیاد رکھ کردوستی کومضبوط کیا، بے نظیر بھٹو چاروں صوبوں کی زنجیر تھیں، سیاسی بحران موجود، ہمیں عوام کو مسائل سے نکالنا ہوگا۔
بلاول بھٹو زرداری کا کہنا تھا کہ وفاقی حکومت کی معاشی مشکلات ہے، پیپلزپارٹی سمجھتی ہے وفاق کے مسائل ہمارے مسائل ہے، وفاق کےمعاشی مسئلے اور پریشانیوں کو دور کریں گے، پیپلز پارٹی چاروں صوبوں کی زنجیر ہے۔
اُنہوں نے تجویز دیتے ہوئے کہا کہ وفاق کو حبکو، سبکو جیسے اداروں کا بوجھ اتار کر صوبوں کو دینا چاہیے، ہم وفاق سے بہتر پرفارم کریں گے، ہم سب کو مل کرمعاشی مسائل کوحل کرنا چاہیے، جیالوں کو کہتا آ رہا ہوں مہنگائی کا مسئلہ بانی پی ٹی آئی دور سے تھا۔
چیئرمین پاکستان پیپلزپارٹی کا کہنا تھا کہ مگرکیا کروں عوام حکومت کےدعوے کونہیں مان رہے، عوام پوچھتے ہیں ہمیں کب پتا چلےگا معاشی ترقی ہورہی ہے۔
بلاول بھٹو زرداری نے کہا کہ عوام مہنگائی، بےروزگاری اورغربت کا مقابلہ کر رہے ہیں، اداروں میں صلاحیت کا بحران ہے، بجلی ، گیس، اشیائے ضروریہ سمیت ہر چیز مہنگی ہوتی جا رہی ہے، پیپلزپارٹی میں ہی وہ صلاحیت اور منشور ہے جو عوام کومشکلات سے نکال سکتے ہیں۔
اُن کا کہنا تھا کہ پیپلزپارٹی کی پالیسیوں کوعوام دوست سمجھا جاتا ہے، صدر زرداری نے بےنظیر انکم سپورٹ انقلابی پروگرام شروع کیا، غریب خواتین کو اِس کےذریعےمالی مدد فراہم کی جا رہی ہے، ہم سندھ میں غریب خواتین کے لیے بیس لاکھ مکان بنا رہے ہیں۔
چیئرمین پاکستان پیپلزپارٹی نے کہا کہ عام آدمی مہنگائی کےبوجھ تلےدب کررہ گیا ہے، آج کے دور میں تنخواہ سے گھر کے اخراجات پورے نہیں ہو رہے، آج ہر گھرانہ معاشی تنگی کا شکار ہے، سندھ کےاین آئی سی وی ڈی کا مقابلہ دنیا سے ہے، اگرکہیں مفت علاج ہوتا ہے تویہاں ہوتا ہے۔
بلاول بھٹو زرداری کا کہنا تھا کہ گمبٹ کی تحصیل خیرپورمیں ہربیماری کا مفت علاج ہوتا ہے، ان ہسپتالوں میں پچاس فیصد مریض سندھ سے باہر سے آتے ہیں، ہم اِن مریضوں کوسندھ میں ویل کم کرتے ہیں،غریبوں کی معاشی مشکلات کواسی طریقےسےحل کیا جاسکتا ہے۔
اُنہوں نے کہا کہ زراعت پاکستان کی معیشت کی بیک بون ہے، زرعی ایمرجنسی پر وزیراعظم کے شکر گزار ہیں وہ پیپلزپارٹی کی بات اور تجویز کو مانتے بھی ہیں، سیاسی بحران موجود ہے، ہمیں عوام کے مسائل کو دیکھنا ہوگا، ہم نے سیلاب متاثرین کوریلیف دیا۔
چیئرمین پاکستان پیپلزپارٹی کا کہنا تھا کہ شہید بےنظیربھٹو کا آخری پیغام مفاہمت کا تھا، سیاسی بحران سے نکلنےکے لیے آج نہیں تو کل مفاہمت کی ضرورت ہو گی، مفاہمت کو کامیاب بنانے کے لیے سیاسی انتہا پسندی کوچھوڑنا پڑے گا.
بلاول بھٹو زرداری نے کہا کہ نو مئی جیسے حملے، اداروں کو گالیاں دینا یہ سیاسی دائرے میں نہیں ہوتے، جیالوں سے پوچھتا ہوں اگر صدر زرداری یا مجھے گرفتار کیا جائے تو کیا میں کور کمانڈر پر حملہ کرنے کا کہتا تو کیا آپ کے ساتھ رویہ سخت نہ ہوتا؟
اُن کا کہنا تھا کہ قائد کو تختہ دار پر چڑھایا گیا مگر ہم نے سیاسی طور پر مقابلہ کیا، اگر کسی کو ایک سیاسی فرد سے کوئی امید ہے تو مفاہمت کا بادشاہ صدر آصف زرداری ہی نکال سکتے ہیں۔
چیئرمین پاکستان پیپلزپارٹی نے آصف علی زرداری کو مفاہمت کا بادشاہ قرار دے دیا، اُنہوں نے تجویز دی کہ سیاست کو واپس سیاست کےدائرے میں لانا ہو گا، حکومتی جماعتوں کوبھی ملکی مفاد میں سوچنا چاہیے۔
