اسلام آباد: نازیبا تصاویر کے ذریعے خاتون کو بلیک میل کرنے والا ملزم گرفتار
اسلام آباد: (دنیا نیوز) نیشنل سائبر کرائم انویسٹی گیشن ایجنسی (این سی سی آئی اے) نے خاتون کو نازیبا تصاویر کے ذریعے بلیک میل کرنے والے ملزم کو گرفتار کرکے مقدمہ درج کرلیا۔
حکام کے مطابق این سی سی آئی اے اسلام آباد کو خاتون نے شکایت کی کہ ملزم رضوان اللہ نے غیر قانونی طور پر ان کے سوشل میڈیا اکاؤنٹس تک رسائی حاصل کی اور ڈیٹا چوری کیا، بعدازاں قابل اعتراض تصاویر واٹس ایپ کے ذریعے ڈسپلے کیں۔
خاتون کی شکایت پر نیشنل سائبر کرائم انویسٹی گیشن ایجنسی نے انکوائری کی تو الزامات درست ثابت ہوئے، جس پر سب انسپکٹر مصباح بتول کی سربراہی میں این سی سی آئی اے کی ٹیم نے ملزم کو چھاپہ مار کر گرفتار کرلیا۔
حکام نے بتایا کہ ملزم نے خاتون کو موبائل فون کے ذریعے دھمکیاں بھی دیں اور رقم نہ دینے کی صورت میں تصاویر وائرل کرنے کا کہتے ہو بلیک میل بھی کیا، ملزم کے قبضے سے برآمد ہونے والے موبائل فون کی تکنیکی تجزیاتی رپورٹ میں بھی جرم کے ناقابل تردید ثبوت برآمد ہوئے۔
ملزم کے خلاف پیکا ایکٹ 2016ء کی دفعات 21 اور 24 کے تحت مقدمہ درج کر لیا گیا، زیر حراست ملزم سے مزید تفتیش جاری ہے۔
