سائنسدانوں کا زمین کی گہرائیوں میں پانی کے ذخائر موجود ہونے کا انکشاف
بیجنگ: (ویب ڈیسک) چینی سائنس دانوں کی ایک تازہ تحقیق میں انکشاف ہوا ہے کہ زمین کے وجود میں آنے کے ابتدائی عرصے میں سیارے کی گہرائی میں واقع نچلے مینٹل میں پانی کے وسیع ذخائر موجود تھے۔
جرنل سائنس میں شائع ہونے والی تحقیق کے مطابق چار ارب برس سے بھی زیادہ عرصہ قبل زمین کے نچلے مینٹل میں بڑی مقدار میں پانی پایا جاتا تھا، یہ تحقیق چائینیز اکیڈمی آف سائنسز کے تحت گوانگژو انسٹیٹیوٹ آف جیو کیمسٹری کے ماہرین نے کی۔
سائنس دانوں نے جدید لیبارٹری تکنیک کا استعمال کرتے ہوئے یہ جانچنے کی کوشش کی کہ جب زمین ٹھنڈی ہو کر پگھلے ہوئے میگما (لاوا) سے ٹھوس شکل میں تبدیل ہوئی تو اس دوران پانی کا رویہ کیسا رہا ہوگا۔
تحقیق کے مطابق اس دریافت کا مرکز معدن برجمینائٹ ہے جو زمین کے نچلے مینٹل میں وافر مقدار میں پایا جاتا ہے اور پانی کو اپنے اندر محفوظ رکھنے کی صلاحیت رکھتا ہے جبکہ یہ تحقیق زمین پر پانی کی ابتدا اور اس کے ارتقا کو سمجھنے میں اہم پیش رفت ثابت ہو سکتی ہے۔
