پاکستان اور ایشیائی ترقیاتی بینک کے درمیان 730 ملین ڈالر کے دو منصوبوں پر دستخط
اسلام آباد: (دنیا نیوز) پاکستان اور ایشیائی ترقیاتی بینک کے درمیان 730 ملین ڈالر کے دو منصوبوں پر دستخط ہوگئے۔
منصوبوں میں 330 ملین امریکی ڈالر مالیت کا سیکنڈ پاور ٹرانسمیشن سٹرینتھننگ پراجیکٹ شامل ہے، سرکاری ملکیتی اداروں کی ٹرانسفارمیشن کا 400 ملین ڈالر کا پروگرام بھی شامل ہے۔
سیکرٹری اقتصادی امور محمد حمیر کریم نے اے ڈی بی کی مسلسل معاونت کو سراہا اور کہا کہ ٹرانسمیشن منصوبہ آنے والے پن بجلی کے منصوبوں سے 2,300 میگاواٹ بجلی کی ترسیل کو ممکن بنائے گا۔
محمد حمیر کریم کا کہنا تھا کہ منصوبہ موجودہ ٹرانسمیشن لائنوں پر اضافی بوجھ کو کم اور ہنگامی حالات میں نظام کی مضبوطی میں اضافہ کرے گا۔
.jpg)
سیکرٹری اقتصادی امور نے کہا کہ ٹرانسفارمیشن پروگرام، ایس او ای ایکٹ 2023 اور ایس او ای پالیسی 2023 پر مؤثر عملدرآمد کو مضبوط بنائے گا۔
اے ڈی بی کی کنٹری ڈائریکٹر ایما فان نے ان اقدامات کے لیے حکومتِ پاکستان کے مضبوط عزم کو سراہا اور توانائی کے بنیادی ڈھانچے کو مضبوط بنانے میں ٹرانسمیشن منصوبے کی اہمیت پر زور دیا۔
ایمافان نے کہا کہ سرکاری ملکیتی اداروں کی اصلاحات کا پروگرام پاکستان کے لیے ایک نہایت اہم ہے، فریقین نے فنانسنگ کو موثر طور پر استعمال کرنے، منصوبوں کی کامیاب اور بروقت تکمیل کے لیے عزم کا اظہار کیا۔
